Un chantadino logra pola vía xudicial que lle devolvan 70.000 euros
01 mar 2013 . Actualizado a las 15:13 h.A vía xudicial era ata agora un camiño secundario para os afectados pola venda de participacións preferentes e subordinadas. A paralización dos procedementos de arbitraxe e as primeiras sentenzas xudiciais favorables poden estar mudando esta realidade. A avogada lucense Ana María Veiga Aguiar acaba de gañar o caso dun veciño de Chantada que tiña 70.000 euros bloqueados en participacións preferentes desde o 2009.
-¿Esta é a primeira sentenza dictada en Lugo sobre as preferentes?
-Creo que nos xulgados da cidade de Lugo, si. Nin a min nin a plataforma de afectados nos consta que haxa outra. Estamos empezando a gañar sentenzas.
-¿E que di o tribunal?
-Declara nulo o contrato e condena á entidade a devolver os 70.000 euros e a pagar os intereses legais acumulados desde o 2009. E o cliente ten que devolver os xuros que cobrou.
-¿Quen é o demandante?
-Un veciño de Chantada de 55 anos. O importante desta sentenza é que esta persoa non ten o perfil dun analfabeto. O que sucede é que carece de coñecementos finaceiros, non podía contratar un produto de risco, nunca o fixera. A sentenza demostra que para reclamar non é preciso ter ese perfil, que dá a sensación de que só poden recuperar os seus cartos os menores de idade.
-¿E por que lles deu a razón o tribunal?
-Alegamos que existiu un erro de vicio de consentimento. A este home ofrecéranlle este produto financeiro como se fose un depósito a prazo. Eses cartos eran os seus aforros, previamente tíñaos a prazo fixo. A directora da oficina ofreceulle un depósito con algo máis de rendibilidade, pero con total disposición do capital.
-Supoño que o difícil será demostrar todo isto.
-Hai indicios. Neste caso non apareceu a orde de valores, que é o contrato de adquisición, na entidade financeira non lle fixeron o test de idoneidade, obrigatorio desde o 2007...
-¿Testificou o persoal da entidade financeira?
-A directora. Admitiu que non lle fixeran o test, pero dixo que a ela lle parecía que o meu cliente daba o perfil dun investidor.
-¿E non responde?
-Non. Nin os outros afectados cos que teño demandas presentadas. Vendéronlles as preferentes como depósitos a prazo. É xente que non xogaba cos seus cartos. Un investidor non ten 50.000 euros depositados sete anos. Sería un contrasentido.
-¿Cantos casos máis leva?
-En Lugo bastantes. Estou agardando tres sentenzas máis que espero que saian en cuestión de semanas.
-¿A arbitraxe parécelle unha boa opción?
-Penso que se está enfocando cara un perfil moi concreto de afectado, a xente moi maior, os que sofriron engano abertamente ou foron confundidos para contratar.
-¿Arbitraxe e demanda civil son incompatibles?
-Pódese presentar unha demanda incluso despois de ter solicitada a arbitraxe, sempre que un estea aínda agardando a que o chamen.
-¿Como se especializou nisto?
-Moitos coñecidos e familiares meus están afectados.
-¿Leva algún caso especialmente chamativo?
-Todos os meus clientes están con profundas depresións. Son xente aforradora, emigrantes, traballadores... Un deles está no paro e ten todos os seus aforros en preferentes. É unha cantidade moi grande e non pode dispor dela. E foi claramente enganado.
Ana María Veiga Aguiar avogada