A Piringalla repartirá gratuitamente máis de 340 quilos de becerro asado ao espeto, e haberá máis de 240 fogueiras
23 jun 2015 . Actualizado a las 05:00 h.Centos de lumes de San Xoán iluminarán hoxe a provincia de Lugo de norte a sur e de este a oeste na noite máis curta do ano. Fontes do Concello de Lugo sinalaron que ata onte ao mediodía xa recibiran 238 solicitudes para acender fogueiras nos barrios e nas parroquias, e o prazo para pedir as autorizacións rematará hoxe á unha da tarde. Unha das actividades máis destacadas terá lugar na Piringalla, onde se celebrará a Festa do Becerro ao Espeto a partir das nove da noite. Organizada pola Asociación Veciñal San Isidro da Piringalla e a Asociación de Veciños, Comerciantes e Industriais da Milagrosa, na cita repartiranse máis de 340 quilos de carne de dous becerros doados polo empresario César Dorado, ademais de 150 quilos de pementos e 25 sacos de pan, acompañados por 150 litros de viño, 200 de cervexa e 300 de refrescos. Amenizará a verbena a orquestra Bomba & Band Canarias, e haberá sorteo antes do acendido da fogueira, que está previsto para as 23.45 horas.
Música e malos espíritos
Outra das poboacións lucenses nas que se vivirá esta madrugada a tope será Guitiriz, que vivirá a terceira xornada das súas patronais. Ao mediodía haberá pasarrúas de Os Trileiros, e pola tarde concerto da Banda Municipal no campo da feira ás 19.30 horas. A continuación, comezará unha sardiñada popular e verbena cunha das orquestras máis importantes de Galicia, a Filadelfia, ás 23.30 horas. Pouco antes da media noite prenderase o lume novo de San Xoán para espantar aos malos espíritos. Sarria é outro dos puntos que tamén celebra estes días as súas patronais por todo o alto. Alí a fogueira arderá a partir das doce da noite no campo da feira.