O lucense Félix Amor é o artífice deste orixinal e solidario proxecto. A súa experiencia en retos e aventuras está máis que probada, pois xa participou no Reto Mongolia do 2012 ou no Panda Raid do 2013.
-¿Como xurdiu a idea desta iniciativa?
-Tiña unha amiga con cáncer, e no 2012, despois da viaxe a Mongolia, dixéronme que non tiña solución. Foi un duro golpe. Morreu de leucemia esta amiga e despois duns meses quixen facer algo; o primeiro foi facerme doante de médula, pero sentía que iso non chegaba. Así que tiven ocasión de falar co colectivo Somos Unidos por el Cáncer e xurdiu a idea desta viaxe. Queremos recadar fondos para a investigación, provocar ilusión entre os nenos enfermos, dar a coñecer tamén esta doenza e animar á xente a facerse doante de médula.
-¿Como se levará a cabo a recadación de fondos para destinar á investigación do cancro?
-De varias formas. Á volta da viaxe venderemos o coche e outros obxectos, como a tenda de campaña ou os sacos de durmir. Ademais, na gala que faremos antes de saír ou en calquera outro momento, quen desexe colaborar a maiores, particular, empresa ou administración, pode facelo. En calquera caso, queremos facernos oír e se conseguimos un só doante de médula todo isto xa merece a pena.