A Capela de Santa María exporá obras de 27 artistas españoles e portugueses
14 mar 2012 . Actualizado a las 14:50 h.A deputada de Deseño e Artesanía, Regina Polín, presentou este mediodía a mostra «73x73x273, A Irmá do soño», a nova exposición que o Centro de Artesanía e Deseño leva á Capela de Santa María, amosando os traballos de 27 dos artistas españoles e portugueses. Con esta mostra, organizada conxuntamente pola Universidade de Santiago, a Deputación dá un paso máis cara a consolidación definitiva desta Capela coma espazo cultural de referencia, sinalou a deputada. Cun título que fai referencia precisamente á morte, tanto polos números 73x73x273, que son as medidas dun nicho de enterramento, tanto por esa referencia literaria que identifica á morte coma un profundo soño, esta exposición ven de exhibirse na Igrexa da Universidade de Santiago, onde acadou un notable éxito de crítica e público.
Entre os 27 artistas, destacan os lucenses Paco Pestana, Eduardo Valiña, Ignacio Pardo, Álvaro de la Vega, Cristian Villamide, Roberto González, Mónica Alonso e Montse Rego comparten con Pamen Pareira, Fernando Páez, Xurxo Lobato, Victoria Diehl e Antonio Blanco, todos eles procedentes da Coruña; os pontevedreses Antón Lamazares, Xurxo Oro Claro, Xaquín Chaves, Manuel Sendón, Fran Herbello, Andrea Costas e Ruth Massó; de Ourense proceden Ramón Conde e Xulio Gil. A sevillana Ana Soler, o portugués Paulo Neves e o pacense Teo Soriano completan a nómina de artistas que están presentes nesta mostra.
A exposición abrirá as súas portas mañá, ás 20.00 horas. Ata o 20 de maio, todos os que desexen achegarse ata a Capela de Santa María poderán facelo no seguinte horario: de luns a venres, de 10.30 a 14.00 e de 17.00 a 20.00 hoas; sábados, de 17.00 a 20.00 horas e domingos de 11.00 a 14.00 horas. A entrada é totalmente gratuita.