Castros que seguen á espera de arqueólogos

francisco albo MONFORTE / LA VOZ

O SAVIÑAO

O castro da Torre ou de Sobredo, no Courel, é o único do sur lucense que foi obxecto dunha intervención arqueolóxica antes dos de Arxerix e Cereixa. Pero o traballo non pasou da fase inicial ALBERTO LÓPEZ

Restos de murallas no castro de Vilamor do Courel CARLOS RUEDA

Castro de Góo, no municipio do Incio CARLOS RUEDA

Castro do Medorrón, na parroquia monfortina de Sindrán CARLOS RUEDA

Castro de Vilamor do Courel CARLOS RUEDA

Castro das Xaíñas, en Monforte CARLOS RUEDA

Muros no castro de Pol, en Monforte CARLOS RUEDA

A silueta do castro do Eivedo recórtase nunha elevación sobre o pequeno núcleo do mesmo nome, situado na parroquia monfortina de San Xillao de Tor CARLOS RUEDA

Restos de aterrazamentos e murallas asoman entre a vexetación, sinalando a presenza do castro de Vilar de Ortelle, un dos vinte que están localizados no municipio de Pantón CARLOS RUEDA

Entre os numerosos castros da Serra do Courel relacionados coas minas da época romana, o de Vilar destaca polas súas imponentes construcións defensivas CARLOS RUEDA

Situado na parroquia de Distriz, o castro de Babela encóntrase nas proximidades do casco urbano de Monforte e tamén a moi escasa distancia da estrada N-120 ALBERTO LÓPEZ

O castro das Cortellas é un dos 31 asentamentos castrexos localizados no municipio do Incio. Como sucede con moitos outros, os seus foxos e murallas están cubertos pola vexetación CARLOS RUEDA

A asociación cultural O Colado do Vento acondicionou recentemente unha ruta de sendeirismo que leva ao castro de Vilanova, na parroquia de Barantes, en Sober CARLOS RUEDA

O castro de Marce, en Pantón, destaca pola súa espectacular ubicación, no alto dun promontorio sobre a marxe esquerda do Miño. Unha ruta de sendeirismo leva ata este lugar carlos rueda

Escavacións no castro de Arxeriz (O Saviñao) no verán do 2015

Una sondaxe magnética no castro de San Lourenzo (A Pobra do Brollón), que será escavado en agosto XURXO AYÁN

No sur lucense hai numerosos asentamentos castrexos de grande interese que nunca foron investigados

23 jun 2016 . Actualizado a las 21:14 h.

O castro de San Lourenzo -na parroquia de Cereixa, na Pobra do Brollón-, onde está proxectado realizar escavacións en agosto, será o terceiro do sur lucense onde se leve a cabo unha intervención arqueolóxica. O segundo foi o de Arxeriz, no Saviñao, onde os traballos comezaron no 2013 e seguen na actualidade. Antes destes dous casos, o único precedente é o do castro da Torre ou de Sobredo, no Courel, onde a mediados dos noventa se efectuaron unhas escavacións e se consolidaron restos de construcións para mostralos aos visitantes. Estas iniciativas están moi lonxe de esgotar as posibilidades de investigación arqueolóxica do patrimonio castrexo da zona.

O arqueólogo Xabier Moure ten contabilizado nada menos que 292 castros entre as comarcas de Lemos, Quiroga e Chantada e o municipio do O Incio. Os territorios municipais que contan cun maior número de asentamentos castrexos coñecidos son os de Quiroga -con corenta-, O Saviñao -con 36- e Chantada, con 33. Os menos numerosos son os de Bóveda, cunha decena, e Ribas de Sil, con nove. Investigar a fondo todos estes antigos asentamentos parece pouco factible, sen contar con que moitos deles están moi deteriorados polos labores agrícolas ou por construcións de diferentes épocas. Pero entre todo este patrimonio destacan algúns casos onde as intervencións arqueolóxicas poderían ser máis recomendables.

O arqueólogo Iván Álvarez Merayo, que participou nas escavacións de Sobredo, sinala que aqueles labores non puxeron ao descuberto máis que unha pequena parte do xacemento e que para extraerlle todo o que pode dar de si habería que traballar moito máis. Pola súa parte, Moure ten aconsellado intervir no castro de Babela, situado na parroquia monfortina de Distriz. Na súa opinión, o lugar é especialmente idóneo para as visitas turísticas pola súa proximidade ao casco urbano e á estrada N-120. Noutros casos, como o de Marce -en Pantón-, os castros encóntranse en paraxes de grande espectacularidade que xa están incluídos actualmente en rutas de sendeirismo.