O tradicional festexo carnavalesco abarrotou de novo as rúas da localidade
09 feb 2016 . Actualizado a las 22:05 h.O cartel anunciador do Entroido de Salcedo deste ano mostraba ao Oso apuntando ameazadoramente cun dedo para o espectador e ruxindo: «Voute tinguir... e sábelo!!!». Como era de esperar, o protagonista do carnaval tradicion da Pobra do Brollón cumpríu a súa promesa. En torno ás cinco da tarde, a fera carnavalesca saíu cos criados ás rúas da localidade, abarrotadas de veciños e visitantes. O tempo estaba un tanto chuvioso, pero aos adeptos deste singular festexo non lles importou o máis mínimo.
Entre paraugas, chubasqueiros e moitas cámaras fotográficas e videográficas, o Oso e o seu séquito iniciaron os ataques e en pouco tempo a proporción de caras tinguidas con cinza foi aumentando de forma exponencial. Entre as súas numerosas vítimas deste ano contouse o alcalde de Monforte, José Tomé, quen se presentou na festa provocadoramente ataviado de traxe e gravata. Non foi tan ousado o presidente da Deputación, Darío Campos, quen acudira a Salcedo xunto con Tomé por convite do alcalde da Pobra, José Luis Maceda. Campos abandonou o lugar pouco antes da saída do Oso, sabedor de que este non respecta autoridades locais nin provinciais. Nin tampouco aos visitantes estranxeiros, como puido comprobar un cidadán británico que apelou á súa nacionalidade e alegou que non entendía ben a festa. O Oso encargouse de que marchase ben informado.