Manuel López: «Os soutos ofrecen moitas posibilidades»

f. a. MONFORTE / LA VOZ

O SAVIÑAO

López falará en Escairón sobre o presente e o futuro da castañicultura galega

22 ene 2014 . Actualizado a las 07:00 h.

Natural do Saviñao, Manuel López é o secretario do consello regulador da indicación xeográfica protexida Castaña de Galicia. O día 31, ás 16 horas, ofrecerá no auditorio de Escairón unha charla divulgativa sobre a situación actual e as posibilidades da castañicultura galega.

-¿Que posibilidades hai de intensificar o cultivo dos castiñeiros no sur lucense?

-Todos os municipios da provincia, excepto os da zona costeira, están dentro da área de produción da indicación protexida, así como todos os de Ourense. Isto significa de que toda esta zona é adecuada para facer novas plantacións e susceptible de recibir axudas oficiais para iso, independentemente de que aquí xa haxa moitos soutos tradicionais. A normativa actual permite conseguir subvencións para plantar castiñeiros en moitos tipos de terreo, mesmo nos que se dedicaban antes a hortas, prados ou plantacións de millo.

-¿En que medida é posible vivir hoxe da castañicultura?

-Un aspecto moi interesante que ten é que deixa moito tempo libre para dedicarse a outras cousas, sexa para desenvolver máis actividades económicas ou para o lecer. Coidar un souto e colleitar castañas require relativamente pouco tempo e pode proporcionar un beneficio económico importante. Creo que potenciar esta actividade pode ser de moita axuda para as zonas deprimidas de Lugo e Ourense, en especial para as áreas de montaña.

-¿Pódeselle sacar máis proveito a esta actividade do que se obtén actualmente?

-A castaña galega ten un prestixio moi grande fóra de Galicia e a proba é que desde hai moito tempo se venden fraudulentamente castañas doutras procedencias facéndoas pasar por galegas. Fomentar a produción propia de castañas de alta calidade, polo tanto, significa potenciar un recurso tradicional de moito valor económico. E hai que ter en conta que a castaña non serve só para vender en fresco e que ten moitas posibilidades que ata agora aquí non se aproveitaron pero noutros lugares si. A castaña galega úsase para fabricar xeados no Xapón e cervexas en Córcega, por exemplo. Entre o 80% e 90% da nosa castaña que se utiliza en segunda ou terceira transformación vai para fóra.

-¿Os soutos poden ter outros usos paralelos aparte de producir castañas?

-Ofrecen moitas posibilidades, que van desde o cultivo de cogumelos ata o aproveitamento da madeira en moblería ou cestería. O mercado da madeira de castiñeiro non está actualmente moi potente, pero iso non sigifica que non poida recuperarse.

manuel lópez secretario da indicación xeográfica castaña de galicia