«Pido a todo o mundo que participe nunha marcha que vaia da explotación á educación, da pobreza a unha prosperidade compartida, da escravitude á liberdade, da violencia cara á paz» (Kailash Satyarthi)
Para a imaxe recollemos as portadas dos últimos anos nos que se conmemorou o Día Mundial contra o Traballo Infantil, que ten a súa data habitual o 12 de xuño e que, co gallo da visita de Kailash Satyarthi a Santiago e á Coruña, adiantamos hoxe aquí. Cada portada vai acompañada dun informe que explica o seu motivo e razón da súa insistencia ese ano.
Para o son propomos a reprodución de dúas cancións: unha, «Til Everyone Can See», elixida pola Organización Internacional do Traballo (OIT) para recordar ese día; e a segunda, a nana «Para durmir a un neno que non descansa», interpretada por Isabel Jurado e a Orquesta Ciudad de Almería.
1. IMAXES
Segundo as estimacións mundiais máis recentes, millóns de nenos de 5 a 14 anos de idade atópanse en situación de traballo infantil. Neste grupo de idade, os nenos de ambos os sexos son afectados case por igual. A persistencia do traballo infantil ten as súas raíces na pobreza, a falta de traballo decente para os adultos, a falta de protección social e a incapacidade para asegurar a asistencia dos nenos á escola ata a idade mínima legal de admisión ao emprego. Así o afirma a Organización Internacional do Traballo (http://goo.gl/DOFOQK).
- 2015. ¡Non ao traballo infantil! ¡Si a unha educación de calidade! Unha educación de calidade, gratuíta e obrigatoria para todos os nenos ata polo menos a idade mínima de admisión ao emprego e emprender accións para chegar a aqueles nenos actualmente en situación de traballo infantil.
- 2014. Actividades ao redor do mundo. Estender a protección social dos nenos: axudas para as familias con nenos, pensións, coidado da maternidade, protección aos nenos con problemas, protección ás familias en paro, coidar a saúde.
- 2013. Non ao traballo infantil no ámbito doméstico. Uns 10,5 millóns de nenos de todo o mundo traballan como empregados domésticos nos fogares doutras persoas, en condicións perigosas e nalgúns casos análogas á escravitude.
- 2012. Dereitos humanos e xustiza social. Erradiquemos o traballo infantil. Os convenios da OIT buscan protexer aos nenos da exposición ao traballo infantil. Estes convenios, xunto con outros instrumentos internacionais relativos aos dereitos do neno, dos traballadores e os dereitos humanos, proporcionan un marco importante para a lexislación establecida polos gobernos. Con todo, as estimacións globais máis recentes da OIT indican que no mundo hai 215 millóns de nenos vítimas do traballo infantil, e que máis da metade destes están involucrados nas súas peores formas.
- 2011. Nenos en traballos perigosos. O que sabemos, o que queremos facer. A OIT pediu tomar medidas urxentes para erradicar o traballo infantil perigoso que no 2011 afecta a uns 115 millóns de nenos en todo o mundo. A OIT destaca que ese número representa máis da metade de todos os traballadores infantís no mundo, que se estiman en 215 millóns.
- 2010. Metamos un gol e saquemos cartón vermello ao traballo infantil. O día mundial do 2010 coincidía coa Copa Mundial de fútbol en Sudáfrica. No mundo hai millóns de nenos traballadores. Máis da metade deles realizan actividades que pon en perigo a súa saúde e a súa seguridade. Isto é inaceptable. Participe no movemento mundial «sácalle o cartón vermello ao traballo infantil» e axude a ofrecer un novo comezo aos nenos en todo o mundo.
?
- 2009. Demos unha oportunidade ás nenas. Loitar contra o traballo infantil: unha clave para o futuro. A OIT estima nuns 100 millóns o número de nenas afectadas pola explotación infantil en todo o mundo. Moitas delas teñen difícil o acceso á educación, ou non teñen acceso a ela, e moitas traballan en condicións que pon en grave perigo a súa saúde, a súa seguridade e a súa moralidade.
2. PALABRAS E CANCIÓNS
A iniciativa A música contra o traballo infantil, lanzada no 2013 pola OIT e algúns dos mellores compositores do mundo, invita a participar a todos os músicos e pídelles que dediquen un concerto ou unha canción á loita contra o traballo infantil.
«Til Everyone Can See»
O 12 de xuño, Día Mundial contra o Traballo Infantil, foi lanzada a campaña Cartón Vermello da OIT cunha canción orixinal, Til Everyone Can See, composta polo guitarrista Mike Einziger, de Incubus, e a violinista Ann Marie Simpson, coa participación de Travis Barker, Minh Dang, Dominic Lewis, LIZ, Pharrell Williams e Hans Zimmer.
Nana «Para durmir a un neno que non descansa»
Himno: Pilar Jurado, colaboradora especial da OIT, Orquesta Ciudad de Almería, Coro Infantil Pedro Mena. A gravación pódela baixar de YouTube: (http://goo.gl/D1GLXV).
Dorme, dorme pequeno, / que a lúa che leve a ser feliz. / Dorme, dorme pequeno, / que o vento che eleve / como un copo de neve. / Que poidas elixir o teu camiño / e vivas ese mundo de nenos / onde ninguén che impida xogar. // Dorme, dorme pequeno, / xa é hora de descansar, / soñar con pupitres, / poder debuxar / o teu nome e o teu riso, / vivir en liberdade. / Dorme, dorme, dorme...