Xosé Luís Armesto : «O novo reitor vai ter unha situacion mellor que a destes anos»
GALICIA
A Xunta dotará de liquidez económica á UDC «para rematar o 2015»
09 sep 2015 . Actualizado a las 05:00 h.Pouco máis de tres meses. É o tempo que lle queda a Xosé Luís Armesto (A Coruña, 1948) como reitor da Universidade da Coruña. A situación económica ocupará parte dese tempo. Onte mesmo, o equipo de Goberno reuniu aos decanos «para explicar cal é a situación. Imos levantar as restricións de gasto, pero imos recortar as partidas orzamentarias», adiantaba Armesto.
-¿Con que sensación marcha?
-Encantado. Para min é unha experiencia marabillosa. Ter chegado, xa cerca do final da miña vida académica, a ser reitor da universidade da cidade na que nacín e na que traballei para min é unha honra extraordinaria.
-¿Que lle quedou sen facer?
-Sempre queda algo, pero tes a obriga de buscar solucións alternativas. Se non podes ter unha residencia no campus de Elviña porque a Xunta muda de opinión, tes que buscar alternativa, como fixemos en Ferrol e estamos a piques de solucionar en Coruña. Se a docencia de Medicina se estanca, pois é cuestión de perseverar, e despois de moitos anos temos acordo, que non é satisfactorio para todas as partes, pero temos un acordo.
-¿O peor foi a política?
-¡¡Non!! A política é marabillosa... A res pública é o máis importante para min.
-A residencia universitaria da Coruña desatascouse por afinidade política ¿non?
-Iso é relativamente certo, porque coa corporación provincial anterior tamén se iniciaron as consultas e as pararon porque se meteron as eleccións polo medio.
-¿Cal foi o peor momento?
-A morte dun estudante de Erasmus, e tres policías, na praia do Orzán. Acababa de tomar posesión como reitor.
-Para o conselleiro o novo plan de financiamento está acordado...
-Acordado é un pouco esaxerado. Algunhas reunións houbo, pero a Administración autonómica acaba presentando a súa opción, con acordo ou sen el. Co plan de financiamento si se soluciona a reivindicación dos últimos anos da UDC de que se cambiaran os criterios do fondo estrutural, para que sexan en base a canto é o custe de impartir un grupo de docencia. Aí chegamos a un acordo e a Administración autonómica replantexa a súa situación. Agora queda ver a cuestión do reparto por obxectivos, onde esperemos que os indicadores que se usen sexan os adecuados. Iso permitirá que a Administración autonómica nos dote de liquidez para rematar o ano, un pouco a conta do ano que ven.
-¿Un «marrón» para o que veña?
-Ao contrario. Penso que vai ter unha situación mellor da que tivemos estes anos, coa que a Universidade da Coruña nunca estivo conforme.
-Julio Abalde, que soa como o seu sucesor, di que hai que falar de proxectos non de persoas...
-O proxecto sempre é o mesmo, a defensa da universidade pública de calidade dentro do sistema universitario galego.
-A maioría dos que se presentaron contra vostede nas últimas eleccións están agora xuntos, ¿que lle parece?
-É bo. Canto máis se clarifiquen as opcións, mellor para todos, porque así teremos máis claro cal é a aposta que podemos elixir.