Foi un daqueles que pasou polo cárcere por opoñerse a realizar a mili. Agora converte a súa experiencia nun traballo de teatro-documento sobre o movemento de insubmisión
27 ene 2017 . Actualizado a las 05:30 h.Pasaron 23 anos dende aquelas noites na cadea. Pero as sensacións non se esquecen. Como non se esquece o que a teimuda dignidade dos insubmisos, contra todo pronóstico, conqueriu. De todo iso vai Goldi libre.
-Por que revisitar agora aquel episodio?
-Porque sempre está ben reconstruír experiencias colectivas da xente do común. Grazas á construción deses relatos constrúese a memoria.
-É este traballo estritamente un «biopic»?
-Somos estrictos e honestos co que se di no subtítulo: «Autorretrato dun insubmiso preso nos cárceres de Felipe González».
-Por que esa alusión directa?
-Primeiro para situarnos rapidamente no contexto histórico. E tamén por esa categoría de personaxe case mitolóxico que hoxe en día ostenta Felipe González. En calquera caso, a partir dese, o meu relato persoal, pódese crear un retrato do movemento insubmiso e da Compostela daqueles anos.
-Que foi o máis duro entón?
-Houbo unha dobre fractura. A social, de verte de repente en medio do lumpen, e a persoal. Pensas que fago aquí? Por que estou no cárcere? Incluso tes dúbidas de se estás a facer o correcto ou o parvo. E gustounos que esas contradicións tamén estivesen no espectáculo.
-Persoa e personaxe conflúen nesta ocasión?
-É difícil contestar. Porque na obra non son eu o que conta o que me pasou. Cóntao un personaxe ao que chamamos Goldi, que é a persoa na que se transformou César despois de pasar polo cárcere. E non foi fácil meterse no pelexo de Goldi. Porque non era eu senón o que eu fun... É un pouco estrano pero á vez moi divertido.
-Unha sociedade desmilitarizada segue sendo unha utopía?
-Claro, pero ao tempo o feito de que sexa utópico é o que lle dá sentido. O movemento insubmiso estaba cheo de inocencia e á vez de cordura.
-Na sociedade de hoxe sería imposible ou impensable algo así?
-Pois seguramente. Hoxe protestariamos nas redes sociais e tan contentos. Se se volvese a impoñer a mili en España non teño claro que pasaría.