O disco «Uxía canta a Manuel María» recolle o concerto que a artista ofreceu o pasado 6 de outubro na casa-museo do escritor en Outeiro de Rei, xusto o día no que faría 86 anos
23 dic 2015 . Actualizado a las 05:00 h.A cantante Uxía vén de engadir unha nova contribución sonora ao universo poético de Manuel María, un dos autores líricos galegos con maior número de adaptacións e versións por parte de músicos de todos os estilos. Trátase de Uxía canta a Manuel María, editado pola casa-museo do poeta, e que consiste dun cedé, un código para descargar un traballo audiovisual, De amor e cantería, elaborado a partir dos versos do autor chairego, e mais un porta-poemas que contén 52 composicións, unha para cada semana do ano: o 2016 Manuel María será a figura homenaxeada no Día das Letras Galegas.
O disco de Uxía canta a Manuel María recolle o concerto que a artista ofreceu o pasado 6 de outubro na casa-museo do escritor en Outeiro de Rei, xusto o día no que faría 86 anos. Para Uxía foi «un canto ao gardador das albas que nos fai crer aínda no ser humano». O repertorio está formado por composicións sobre poemas do escritor, cantadas por Uxía, ademais de versións de temas anteriores, como O carro, de Baldomero Iglesias, ou Manual do señorito, de Miguel Varela. Con Uxía colaboran os músicos Sérgio Tánnus, Paulo Silva e Santi Cribeiro, ademais do tamén cantante Xabier Díaz, quen se suma a ela para interpretar O melro e Heiche dar un bico.
De amor e cantería, a creación audiovisual para descarga grazas a un código incluído no cedé, foi premio Mestre Mateo no 2011 á mellor creación experimental. Toma como base os poemas de Manuel María e foi elaborado pola fundación que leva o seu nome e producido por Pixel Films, dirixido por Anxa G. Refoxo.
Como engadido a esta edición, os compradores de cada un dos cedés de Uxía canta a Manuel María atoparanse cunha folla de carballo procedente da carballeira de Santa Isabel en Outeiro de Rei, un dos sitios preferidos do poeta e que inspirou moitos dos seus versos. As follas foron recollidas dende o comezo do pasado outono pola viúva do escritor, Saleta Goy, xunto con colaboradores da casa-museo.
Estes traballos poden adquirirse a través da tenda virtual da casa-museo en casamuseomanuelmaria.gal, que ademais ofrece descontos nestas datas.