Retroalimentación apostou esta noite polo pop galego con dúas bandas composteláns con proxectos singulares
25 oct 2014 . Actualizado a las 20:46 h.Xa que como di Caxade, o Womex é para os turistas, dúas bandas de Santiago trasladáronse hoxe a A Coruña mentres alí se levaba a cabo unha cita internacional da música. Os primeiros en subir ao escenario da Mardi Gras foi a banda formada por Le Roi e Martin Wu: Grampoder, que nesta ocasión viñeron acompañados por un teclista amigo. Presumen de facer «rock portátil, pop campestre, folk psicodélico e hardcore comeflores». A actuación, dentro do ciclo de concertos do blog Retroalimentación, serviu para presentar «Golf Whiskey», o seu único traballo ata o momento e que colle o título do sinal náutico que alerta de que un tripulante caeu a auga e coa que se pide axuda para o rescate. Se cadra as reminiscencias náuticas quedáronlles das camisetas a raias da súa anterior banda, The Homens.
Non hai que deixarse enganar polo sons melódicos de Grampoder, as letras de cancións como «Porcos», «Champán», « Fort Bravo» ou «Capitalismo» levan crítica social.
Tamén a fan, aínda que cunha aposta máis folk, Caxade, o proxecto persoal de Alonso Caxade, que define como «música elegante, modesta e sinxela, surrealismo pós-modernista e discurso reivindicativo, metafórico e irónico». É un banda atípica, un éxito audiovisual foi o que lles deu pulo para chegar a «Dança dos moscas», un disco no que amosan a súa clara «implicación social» con ironía e retranca, que acompañan dunha coidada aposta estética.
A súa canción «Xente pota» en contra das clases dirixentes deu visibilidade a unha banda que integran, xunto a Caxade, Manu Paino, Manu Espinho e Xosé Tunhas.
«Sen pasado no presente non teremos futuro», foi unhas das mensaxes de presentación con contido con que anunciaban todos os seus temas. O final de concerto puxéronno as dúas bandas sobre o escenario, antes dos bises onde Caxade tirou da tradición versioneando letras e rematou coa mesma peza que comezou e co obxectivo de que quede algo «as fillas das nosas fillas».