Cabeza Quiles, Cabeza Pereira, Rosalía Fernández e Diana Varela relevan hoxe a Alberto Varela, Xosé María Lema e Xabier Maceiras
08 jul 2017 . Actualizado a las 05:00 h.A Praza dos Libros carballesa está sendo nesta edición máis da Costa da Morte ca nunca. Concibida como feira de creatividade literaria -moito máis alá das letras-, ben quedou así claro onte. Tanto que ata os cans poden viaxar polo espazo nunha mestura do didáctico e da fantasía, que é o eixo sobre o que lle gusta traballar ao carballés Alberto Varela Ferreiro. El foi o encargado de inaugurar a segunda xornada da Praza, dando así a coñecer o seu último libro ilustrado infantil, Kosmocán. Está dispoñible en Amazon, mais a obra tamén espertou a atención de librarías como Brañas Verdes.
Oito son as casetas que se poden visitar na Praza dos Libros, abertas de 11.00 a 14.00 horas e de 18.00 a 22.00. Calquera obra que se merque terá un desconto do 10 % e, ademais, todos os días, hai un sorteo dun lote de libros entre as persoas que mercaran algún nesa xornada. Como feira da creatividade cultural que é, e como futuro que son os máis pequenos, a programación reserva para eles un bo número de actividades: tal foi así o concerto de Pirilampo na tarde de onte. Pouco despois, o vimiancés Xosé María Lema levou ata a carpa do xardín municipal a súa obra Costa do Solpor. O regreso da Illa do Tesouro, unha versión xuvenil algo máis lixeira -de peso- que a obra inicial, pensada para os mozos. Acompañouno Xosé Manuel Varela. Tempo viría despois para o mar e para Carballo. Contos mariños de Carballo é unha obra de Xabier Maceiras, unha aposta do Concello e un dos proxectos centrais do proxecto GALP Carballo é mar. Precisamente a través destes relatos Maceiras reforza a vinculación do municipio co mar e faino a través de acontecementos rexistrados no seu día que aínda perviven na memoria dos maiores, informantes que permitiron sacar á luz parte do pasado local. O edil de Promoción Económica, Xosé Regueira, acompañou ao arteixán na presentación, así como Fernando Patricio Cortizo, historiador; e Guillermo González, xerente do GALP.
Programa para hoxe
Praza da arte
Todo o día • Artistas da zona vinculados ao colectivo Crea Formas impartirán talleres porán á venda mini obras, artesanía, cerámica, fanzines...
Ruta pola arte urbana
11.00 • Percorrido polos murais de Derrubando muros con pintura, con autores do libro homónimo (Engaiolarte). Falarán dos seus relatos e dos murais sobre os que escribiron.
Brinca vai!
11.30 • Concerto infantil a cargo de Paco Nogueiras.
En papel e dixital
13.00 • Presentación cruzada: Fernando Cabeza Quiles falará de Galicia, o galego e os galegos e Fernando Cabeza Pereira, sobre Proyecto Exitium Z.
Sinatura de autores
19.30 • Rosalía Fernández Rial e Diana Varela asinan exemplares das súas últimas obras.
Festifolk Costa da Morte
20.00 • Sesión vermú con VintenBaio e Druídas da Rolda (20.30), percorrido de gaiteiros (21.00), Xacarandaina (22.00) e concerto final da banda escocesa Capercaillie (22.30 horas). Todo gratuíto.