Sofía Agrafojo é voceira do Camiño dos Faros, unha iniciativa de moito éxito na bisbarra
05 may 2016 . Actualizado a las 05:00 h.Sofía Agrafojo é voceira do Camiño dos Faros, unha iniciativa de moito éxito na bisbarra.
-¿Pódese dicir que é un éxito de masas?
-Creo que si. Trátase do desenvolvemento do Camiño dende unha óptica diferente aos grandes investimentos e os grandes desembolsos económicos. Fíxose todo dende unha óptica moi local, aproveitando os recursos que había. E levamos xa seis edicións con esta.
-¿Que impacto ten O Camiño dos Faros?
-Cremos que moito. Logramos captar a moitísimos turistas de fóra, pero sobre todo de aquí. Logramos un feito importante: que os veciños da Costa da Morte coñezan a Costa da Morte dende outra óptica diferente. De feito, moitos dos que veñen unha vez, repiten experiencia porque sempre algo hai diferente para ver, aínda que sexa o mesmo percorrido.
-Como a climatoloxía.
-Si. Un día ves e fai bo tempo e logo regresas e hai temporal, pero iso tamén ten o seu encanto.
-¿Inflúe O Camiño dos Faros nas pernoctacións?
-Dende logo. Xeralmente, a reserva faise para toda a fin de semana. Cando chega Semana Santa ou a tempada estival son moitos os grupos que collen sete días e, incluso, nove ou dez.
-¿Hai moito turista estranxeiro interesado nesta iniciativa?
-Si, e non deixa de sorprender. É certo que a maior parte dos que fan O Camiño dos Faros son, na súa maioría, da zona. Pero chama a atención xente interesada que é de Finlandia ou Italia.
-¿Que papel xoga esta actividade no sector da hostalería local?
-Creo que logramos dinamizar moitos sectores locais. Casas rurais que se xuntan para facer paquetes turísticos conxuntos, bares pequenos que teñen máis clientela, e non só cando hai as rutas, senón todo o ano.