A pavillón de Cabana acollerá este sábado a novena edición da cea solidaria que organiza Cáritas Parroquial de Cesullas, entidade que preside María Jesús Varela.
-Como afrontan estes últimos días antes da cea
-Pois con moito atafego porque estas cousas dan moito traballo. Loitando ano tras ano e coa ilusión de chegar o próximo á cea número dez, e contando cos amigos de sempre porque xa somos como unha familia. Hai que agradecerlle de todo corazón á xente que ano tras ano nos apoia porque sen eles Cáritas non sería nada.
-O que recaden non será só para Cáritas.
-Si, como vimos facendo estes últimos anos, compartiremos con Proxecto Home porque é unha entidade que aí está, que tamén é da Igrexa, que colabora con nós tamén sempre e que fai un labor extraordinario. Con respecto ao resto dos cartos, a diferenza desde este ano é que a nosa parte será para Cáritas Diocesana de Santiago; normalmente sempre o mandabamos a África, pero debido ao que todos estamos vendo en España cada día hai máis necesidades aquí e creo que é lícito empregar eses cartos aquí. Ademais, nas cidades as necesidades son moito maiores que nas aldeas, e nós coa que a xente nos vai axudando no día a día ímonos arranxando.
-¿Canta xente esperan reunir?
-Estamos chegando as catrocentas persoas, pero queríamos chegar ás cincocentas así que a ver se entre todos lle damos un empuxón porque o prezo (20 euros) é case simbólico, é o mínimo que podemos poñer. Desa cantidade, 15 son para o restaurante e os 5 restantes para nós.