«Importa a idea, pero tamén a capacidade de aguante e esforzo»

m. rey / s. g. CARBALLO / LA VOZ

A CORUÑA CIUDAD

Antonio Muíños.
Antonio Muíños. JOSE MANUEL CASAL

Traballa cogomelos e algas e os seus 240 produtos chegan a 30 países

31 oct 2014 . Actualizado a las 05:00 h.

Antonio Muíños (A Coruña, 1962) ten en Cerceda (dende o ano 2011, antes en Cambre ) unha das empresas máis exitosas da alimentación galega: Porto-Muíños. Empezaron con outros produtos, como os cogomelos, pero o salto chegoulle coa aposta polas algas. Hoxe están presentes nuns 30 países, comercializan uns 240 produtos e unha plantilla de case 30 traballadores.

Muíños acude hoxe (12.30 horas) ao Fórum de Carballo, onde se celebra o congreso Innovando cos pés na terra, que organiza Axober, para presentar as creacións do cociñeiro Paco Morales. «É un dos grandes chefs, que nos falará da mestura entre ciencia e gastronomía», explica.

-Morales vai falar da «gastroimpresión». Vaia tema.

-El é un cociñeiro novo, que ten unha perspectiva enorme, que case se pode dicir que leva a gastronomía nos xenes, algo intuitivo. É unha referencia nesta nova xeración de cociñeiros brillantes que hai en España. Pode estar nun montón de restaurantes, agora está nun proxecto en Madrid. E sempre traballa en proxectos novos, agora está coa impresora en 3D para sacarlle o máximo rendemento á gastronomía.

-No seu caso tamén houbo que innovar: dos cogomelos ás algas, hai xa 16 anos.

-Máis que cambiar, complementamos. Tiñamos instalacións, unha fábrica de conservas. Baixaba o consumo e complementamos con recursos da nosa terra. E o que vimos, que case estaba no esquecemento, foron as algas. Con gran identidade na zona. Metémonos a traballar con elas. E foi o esforzo do día a día: do primeiro ano de non vender nada, o segundo 200 quilos, ata agora, que andamos polas 250 toneladas.

-¿Como eran as primeiras reaccións? Sempre houbo reticencias con este produto.

-Aínda queda un camiño longo. A xente víao como algo estraño, non tiñan unha perspectiva de como se dan, onde se dan... Víase como algo que tira o mar fóra. Agora incluso se fan estudos para pensos de animais. Pero tíñase como algo para abonos, non pensaban que era para comer. E empezaron a aceptalas con prudencia, respecto, sen saber moi ben que facer con elas, pero pouquiño a pouco, xa lle soaba que se traballaba en Xapón, e grazas ao mundo da cociña, da gastronomía, os blogs, os medios de comunicación, foron saíndo: empezaron a contar e facer receitas, contar que é unha verdura máis, que se pode facer unha empanada, ou un arroz, e foise rompendo o tabú. Animáronse a probalas e vai medrando o consumo.

-¿Cales son as claves da innovación para despegar? No seu caso, polo menos.

-O máis importante, ademais da idea, que sexa algo con perspectiva de futuro, non traballar con cousas atascadas. Importa a idea, e tamén capacidade de aguante, esforzo e capacidade. As cousas vémolas ás veces a curto prazo, e se non saen a curto prazo, xa non interesan. E hai moitas que hai que ver a medio e longo prazo. Nós, nos primeiros dez anos, non conseguimos beneficios, por iso alternábamos con outra actividade. E traballando fins de semana e tempo libre... Ou disfrutas e cres no que fas, ou se non, é moi difícil. En todo, por sinxelo que pareza, sempre aparecen complicacións, e o máis importante é ter este carácter de sacrificio e esforzo, e entender que cando andas un camiño aparecen tropezos, e tes que demostrar que es capaz de pasalos e saír adiante. E iso, en calquera cousa que se propón, calquera negocio. Tamén importa a formación, aprender e os recursos, que se van buscando, pero a actitude ten que ser positiva e de emprendemento.

ANTONIO MUÍÑOS FUNDADOR DA EMPRESA PORTO-MUÍÑOS