Artur Trillo destaca a gran importancia que teñen os diálogos en Demolición. «A obra está escrita por Cándido Pazó. E iso nótase porque tanto Toño coma min temos moita complicidade con el. A Cándido gústalle moito contar historias, as palabras. A acción dos seus personaxes é escasa. E neste traballo, o que pasa é que o diálogo destripa o que cada persoa quere contar. Os protagonistas atópanse nun lugar inhóspito e teñen moitas historias que botar fóra», destaca o director da compañía ceense, que xa leva nada máis e nada menos que 26 sobre as táboas.
Sobre a obra
«Demolición é un texto para dous actores. De tendencia e referencias realistas e actuais. De intención amena e dinámica. De signo aberto pero aportando a posibilidade de diversas lecturas», destaca a sinopse da obra.
Trillo, por suposto, tamén se someteu ao terceiro grao.
-¿Quen foi Ramón Caamaño?
-Un fotógrafo muxián.
-¿Verbena ou foliada?
-Foliada.
-¿A que dolmen lle chaman a catedral do megalítico?
-Non o teño moi claro, pero supoño que será Dombate.
-¿Cal foi o último faro que se construíu en Galicia?
-A verdade é que nin idea... Vou dicir o de Touriñán.
-¿Cando foi a última vez que puxo unha lavadora?
-Onte.
-¿Un defecto?
-Non saber dicir que non.
-¿Cal é o punto máis occidental de Galicia?
-O cabo Touriñán... Sabíame as respostas pero chiváronmas desordenadas (risas).
-¿Que poeta andaluz lle dedicou un poema á Barca?
-Lorca.
-¿De que castelo foi dono Rui Soga Mariño de Lobeira?
-Supoño que do de Vimianzo.
-¿En que lle gusta pasar o tempo durante as vacacións?
-En rascar a barriga ben rascada, sen facer nada.
-¿Cantos anos ten Avelina Mouzo, a avoa da Costa da Morte?
-Nin idea, pero máis de 90 terá, ¿non?
-Un soño por cumprir.
-Dar a volta ao mundo, pero son consciente de que non se vai cumprir nunca.
-¿Onde está o Pazo de Romelle?
-En Romelle.
-¿Praia téxtil ou nudista?
-Nudista.
-¿Onde naceu o almirante Mourelle?
-Vou dicir en Malpica. ¿Foi en Corme? Quedeime cerca.
-¿Onde prefire rematar o Camiño? ¿En Fisterra ou en Muxía?
-Quédome con Muxía, porque traballo alí os martes.