O Boulevard Lounge de Fisterra celebra o seu terceiro aniversario. Esta noite haberá concerto, como adoita pasar os venres: será o de Smoke Trío, a partir da medianoite (gratuíto). José María Velay Insua, responsable do local, falou onte en Radio Voz Bergantiños.
-Tres anos e pasou moita xente por aí polo Boulevard.
-Si, durante estes tres anos xa tivemos a oportunidade de disfrutar de bastantes concertos. Uns 150 máis ou menos.
-¿Como acolleu a xente este local con música en directo?
-Non había moitos, pero nós cando montamos o local xa o tiñamos claro. Ese era un dos proxectos, ter unha pequena sala de música en directo. A verdade é que o acolleron moi ben, e xa non só a xente de Fisterra, senón a da bisbarra, que se achega cada semana. Os concertos, como norma, funcionan. Nós, despois, temos unha programación moi variada, que abarca dende o flamenco ao punk, o funk, o blues... Iso sempre axuda a traer caras distintas ao local, ademais das máis asiduas.
-¿Que ofrece Smoke Trío?
-Son unha formación da Coruña, un trío acústico que a min me teñen namorado, por dicilo así. A súa é unha música elegante, unha selección moi esmerada e coidada de temas, pero cunha maneira de interpretala que denota moito traballo detrás: unha voz marabillosa, a de Ángel, o cantante... Considerámolos unha das mellores bandas que pasou por aquí e terémolos con nós por terceira vez.