CULTURA O noso patrimonio cultural (III)

4.5. O Patrimonio arqueolóxico

O patrimonio arqueolóxico fórmano aqueles sitios que conteñen restos da actividade humana no pasado. Tamén forman parte deste patrimonio os elementos xeolóxicos e paleontolóxicos relacionados coa historia humana, as súas orixes, os seus antecedentes e o desenvolvemento sobre o medio.

Así, forman parte deste patrimonio arqueolóxico as mámoas, os dolmens os castros, os petroglifos, as pontes e vías romanas, as murallas... Tamén entran no patrimonio arqueolóxico aqueles lugares que só se detectan con excavacións como poden ser o poboados e campamentos prehistóricos, certos tipos de enterramento e xacementos da época romana ou medieval.

4.6. O Patrimonio industrial

O Patrimonio industrial está formado polos restos físicos do pasado tecnolóxico, produtivo e industrial. Forman parte do patrimonio industrial as pontes históricas ?metálicas ou de pedra-, os peiraos antigos, as vellas fábricas de salgado e de conservas de peixe, as de curtido de peles, as fábricas de cerámica, as vellas centrais eléctricas...

4.7. O Patrimonio documental

O patromonio documental está constituído por todos os documentos producidos ou acumulados polas persoas físicas ou xurídicas, públicas ou privadas, no exercicio das súas funcións e das súas actividades; os documentos cunha antigüidade superior ós corenta anos xerados polas entidades e institucións de carácter público, sindical, relixioso, cultural e os documentos de máis de cen anos. Os arquivos son os lugares onde se reúnen, conservan, ordenan e difunden todos eses documentos ó servizo da súa utilización e consulta.

4.8. Os museos

Os museos, segundo di a Lei do Patrimonio Cultural de Galicia no artigo 67, 1, son:

?institucións de carácter permanente, abertas ó público e sen finalidade de lucro, orientadas á promoción e ó desenvolvemento cultural da comunidade en xeral, por medio da recollida, adquisición, inventario, catalogación, conservación, investigación, difusión e exhibición, de xeito científico, estético e didáctico, de conxuntos e coleccións de bens patrimoniais de carácter cultural que constitúen testemuños das actividades do ser humano ou do seu contorno natural, con fins de estudio, educación, gozo e promoción científica e cultural?.

Son, pois, funcións dos museos:

A conservación, a catalogación, a restauración e exhibición das coleccións.

A organización de exposicións científicas e divulgativas de carácter temporal.

A investigación no ámbito das súas coleccións

O desenvolvemento de actividades didácticas respecto dos seus contidos.

Aquelas coleccións, que non reúnen todas as condicións e requisitos dos museos, chámanse coleccións visitables. A Lei tamén fixa unhas condicións para estas coleccións visitables.

4.9. O Patrimonio bibliográfico

O patrimonio bibliográfico está constituído polos fondos e coleccións bibliográficas e hemerográficas, polas obras literarias, históricas e científicas ou artísticas, en calquera tipo de soporte, das que non conste a existencia de polo menos tres exemplares en bibliotecas ou servizos públicos. Tamén forman parte do patrimonio bibliográfico as obras con máis de cen anos de antigüidade.