Juan José Dieste insistiu na importancia que ten a formación para adaptarse ás esixencias dos visitantes
27 may 2015 . Actualizado a las 05:30 h.Aínda que o seu punto forte é a promoción turística, Arousa Norte non escatima esforzos no eido formativo, consciente de que a preparación dos empresarios é fundamental para prestar un servizo de calidade e conseguir así satisfacer aos visitantes. No marco dun novo plan que a mancomunidade poñerá en marcha de xeito inminente xunto coa Escola de Turismo de Galicia, impartiranse seis cursos, nos que poderán participar un total de 180 veciños.
Este paquete de actividades formativas foi presentado onte no centro social de Boiro, nun acto que contou coa presenza do presidente de Arousa Norte, Juan José Dieste; do director de competitividade da Axencia de Turismo de Galicia, José Luis Maestro; e da responsable do departamento formativo do Centro Superior de Hostalería de Galicia, Nuria Sánchez. Este servizo será o encargado de impartir os seis seminarios que tratarán sobre atención ao cliente, hixiene e seguridade alimentaria, atención ao cliente con discapacidade, redes sociais, ferramentas de xestión de alimentos e bebidas e xestión de recursos humanos en pequenos establecementos de restauración.
Arousa Norte foi un dos sete destinos turísticos de Galicia seleccionados para o desenvolvemento deste plan xurdido da Escola de Turismo Itinerante. Na súa intervención, Juan José Dieste insistiu na importancia que ten a formación para adaptarse ás esixencias dos visitantes e para contribuír á mellora continua da imaxe do territorio e á súa diferenciación.
O prazo para anotarse nos dous primeiros cursos de atención ao cliente que se impartirán a partir do 2 de xuño xa está aberto. A idea é que no verán se suspenda o desenvolvemento deste plan formativo para ser retomada en outubro.