Ao candidato de Rianxo en Común preocúpalle o futuro laboral dos mozos
22 may 2015 . Actualizado a las 05:00 h.Antón Castro concorre ás eleccións como cabeza de lista de Rianxo en Común, unha das mareas xurdidas en Galicia. A irrupción desta forza política chama a atención dos internautas, que a través de www.lavozdegalicia.es fixéronlle case vinte preguntas a Castro.
¿Como funcionan as asembleas de Rianxo en Común e como serán se chegan ao poder?
As asembleas sempre foron abertas e seguiran a selo despois das municipais, porque entendemos que a solución dos problemas colectivos é unha cuestión dos veciños na que deben participar sen intermediarios.
¿É posible mellorar a participación e a transparencia no Concello?
É fundamental mellorala e a verdade é que temos moita marxe de mellora. Para nós a participación e a transparencia son os aspectos centrais do que queremos que sexa o noso traballo político cos veciños.
¿Que futuro teñen os mozos na vila en canto ao emprego?
O emprego en xeral e o da mocidade en particular é un tema prioritario que está mal en todas partes. Pero precisamente porque o consideramos esencial dedicaremos os nosos esforzos a traballar sobre o mesmo, sabendo que as posibilidades do Concello son limitadas. As liñas son apuntalar o que hai, apoiar ao comercio local, incentivar e apoiar as ideas de empresa que xurdan, e fomentar a produción, transformación e comercialización de produtos ecolóxicos do mar e do agro.
¿Que ten pensado facer se está no goberno e a Xunta non fai o centro de día para maiores?
Non podo crer que sendo, como é, un equipamento prioritario alguén se negue a facelo, nin en Rianxo nin en Santiago. Se así fora trasladaría a cuestión aos veciños para que entre todos decidiramos o que facíamos.
¿Considera que o actual alcalde fixo os deberes nestes castro anos?
Acertou nalgunhas áreas, cultura, por exemplo, e errou noutras como participación e transparencia, pero tamén é verdade que non era un goberno só do BNG.