Un equipo integrado por estudantes de Muros acadou o primeiro premio no certame de vídeos do programa Lecer Consumo, impulsado pola Consellería de Industria. A directora xeral de Comercio e presidenta do Instituto Galego de Consumo, Sol Vázquez, entregou onte pola tarde na vila muradán o recoñecemento aos gañadores. O propósito do programa era aproximar á poboación os valores do consumo responsable a través do ocio estival.
Os rapaces de Muros que participaron elaboraron un vídeo promovendo actividades de lecer responsable que puideran levarse a cabo no seu municipio. O grupo estivo formado por sete mozos, de entre 9 e 14 anos de idade, asistentes aos campamentos de verán. A súa proposta recibiu máis de 200 votos e acadou deste xeito o primeiro posto no certame.
Quinta edición
Na iniciativa, que chegou á súa quinta edición, participaron 1.200 persoas de 26 concellos galegos. Nesta ocasión, o lema escollido foi Mergúllate nun lecer de balde, que xirou ao redor dos xogos populares. As actividades leváronse a cabo tanto na sede da Escola Galega de Consumo como dentro dos campamentos urbanos impulsados polos concellos, como foi o caso de Muros.