A vila rianxeira converterase o vindeiro fin de semana en epicentro cultural de Barbanza. Ao longo de catro días, entre o xoves e o domingo, dará cabida á Feira do Libro. Como complemento do mercado propiamente dito, desenvolverase un amplo e variado programa, que inclúe desde recitais poéticos ata actuacións musicais, pasando por obradoiros infantís e encontros con escritores.
A inauguración da feira terá lugar o xoves, ás 13.00 horas, e contará coa actuación de María Lado e Lucía Aldao, que presentarán un espectáculo de poesía, música e humor. A xornada inaugural culminará cunha sesión de contos e maxia e cun concerto da banda municipal.
Títeres Babaluva, a Avoa Vouja e a compañía Femme Fatale animarán a feira o venres, día no que Xosé Neira Vilas se achegará a Rianxo para presentar os seus libros Cancela aberta e Aquel neno. Pola súa banda, os autores barbanceses Chisco Fernández Naval e Antón Riveiro Coello participarán nun diálogo sobre a construción da memoria.
O ciclo de presentacións literarias seguirá o sábado con Vanesa Santiago, e Roberto Somoza. Ese día, na carpa infantil instalada na vila, desenvolveranse varios obradoiros infantís a cargo de Marcela Rubiano.
A Feira do Libro chegará ao seu fin o domingo, cunha serie de actividades dirixidas fundamentalmente aos máis pequenos. Tanto pola mañá como pola tarde, os nenos terán ocasión de seguir participando en obradoiros musicais. Levaranse a cabo por idades, habendo un grupo para os cativos de cero a tres anos e outro para os maiores de catro.