As consultas de Oncoloxía do hospital xa funcionan toda a semana, de luns a venres

La Voz BURELA / LA VOZ

BURELA

As consultas ampliaronse un día máis en semana

23 sep 2016 . Actualizado a las 05:00 h.

As consultas de Oncohematoloxía do Hospital da Costa funcionan xa os cinco días da semana dende principios deste mes, o que implica que o servizo está a funcionar a pleno rendemento de luns a venres. O Hospital de Día de Oncohematoloxía de Burela xa administraba tratamentos de quimioterapia os cinco días, pero as consultas eran de luns a xoves, incrementandose xa a toda a semana.

O Hospital de Día de Oncohematoloxía comezou a funcionar en novembro de 2014. Dende entón a súa implantación e ampliación foi constante e gradual, para lograr un afianzamento pleno do mesmo e a súa total consolidación. Neste servizo adminístrase e faise o seguemento dos tratamentos de quimioterapia dos pacientes da área sanitaria norte da provincia, evitándolles os desprazamentos a Lugo e á Coruña que realizaban de xeito periódico para recibir os tratamentos quimioterápicos.

O Hospital de Día de Oncohematoloxía está a atender a uns 275 novos pacientes cada ano (ademais do tratamento e seguemento de todos os pacientes xa diagnosticados). A eles hai que sumar todas as consultas de seguemento, revisións, controis, administración de tratamentos, que estes pacientes precisan e que fixeron que neste servizo se abordaran xa máis de 10.000 actos médicos ao longo destes dous anos. Outra importante novidade foi que o Hospital da Costa creou varios comités de tumores para abordar de xeito multidisciplinar as patoloxías tumorais da área sanitaria, converténdose nun dos hospitais con máis comités especializados. Os pacientes oncolóxicos reciben especial atención no Hospital da Costa, que xa ten implantadas seis vías rápidas (cancro de mama, próstata, pulmón, otorrinolaringolóxico, colon e melanoma).