Oano 1962 foi pródigo na cultura e o deporte locais. O alcalde Pepe Beltrán, querendo sacar partida ás augas da ría, pensou na posibilidade de logralo co piragüismo, que podería axeitarse mellor ás condicións naturais da mesma, e con ese fin organizar a travesía anual. Tivo a intelixencia de involucrar nela a Jacinto Regueira Alonso, árbitro internacional; de grande prestixo no mundo da especialidade; namorado da súa práctica; disposto a realizar canto esforzo e dedicación requerise.Ó longo da vida non coñecimos persoa con tal entusiasmo en faceta algunha; tanta ilusión e entrega por acadar os obxetivos cos que soñaba.
E logrouno, en boa medida, debido á súa reputación nese mundo do piragüismo: ascendencia que exercía dende a absoluta modestia, honestidade e altruismo; de contado a cita acadou soa entre os practicantes do litoral norte, e dos clubes fluviais de Asturias , Galicia e Castela/León, procedencia da maior parte dos palistas; declarouse a proba puntuable para o nacional.
Jacinto Regueira chegaba a Foz no coche de líña a véspera da proba, cargando con bandeiras, boias, cordas, sinais e demais pertrechos organizativos e aquí o esperaban os numerosos trofeos que ocupaban boa parte do seu tempo, pois debía crasificalos e ordealos para que a importancia dos mesmos, atendendo a diversos parámetros, se corresponderan co posto logrado na proba. A entrega espertaba grande expectación, para a que se instalaba un amplo palco nos xardíns Conde de Fontao, diante dunha multitude que os abarrotaba.
Jacinto Regueira, mestre nacional; home de personalidade e puntualidade inglesa; cronómetro e regulamento por bandeira, fora presidente das Federacións Galega e Española;ésta nomeouno vocal do Comité Técnico de Ascensos e Travesías;diploma do Comité Olímpico Internacional polo seu labor a prol do deporte; dirixira competicións e cursiños para árbitros en medio mundo.
El foi alma e corpo do acontecemento que tanto nome díu a Foz no derradeiro medio século que o domingo 19 do actual vivíu a 55 edición, con gran participación.
O persoeiro singular finou hai 15 anos na Coruña. Entre vellos papeis, gardamos unha caricatura súa, realizada polo debuxante lugués Mouriz, con expresiva dedicatoria do deportista, testemuño da nosa afectuosa relación. Cando en Foz se fale da historia do piragüismo local, non pode obviarse o nome de Jacinto Regueira; sería imperdonable.