A Cooperativa Terras da Mariña continúa a traballar na súa internacionalización
28 sep 2016 . Actualizado a las 05:00 h.A Cooperativa Terras da Mariña, presidida por Xosé Cuadrado, participará nunha nova edición de Galician Gourmet Extravaganza. Nesta ocasión levarán o seu produto da IXP Faba de Lourenzá ata Londres. Unha actividade que se desenvolverá do día 3 ó 7 de outubro.
-¿Cantos produtores forman nestes momentos a cooperativa?
-Vinte produtores participan en Terras da Mariña, cun total de 39 hectáreas.
-¿A que concellos pertencen?
-Dos vinte, oito ou nove pertencen a Lourenzá, o resto ós concellos da Mariña.
-¿En que concellos se pode producir a faba dentro da IXP Faba de Lourenzá?
-A Indicación Xeográfica Protexida abarca ós quince concellos de A Mariña.
-¿A que produción chegaron na pasada campaña?
-Recollemos entre 20 e 25 toneladas.
-¿Que expectativas teñen para a colleita de este ano?
-Vai ser escasa. O ano pasado xa houbo pouca, pero este ano debido á seca, aínda haberá menos. Esperemos que o tempo axude para a recollida.
-¿Cando pensan que á poderían rematar?
-Está moi atrasada polo tempo. Aínda non se empezou a recoller ningunha en seco. Calculo que sobre novembro estará rematada.
-¿Cal é o principal mercado da faba de Lourenzá?
-No mercado a granel, dos domingos, os principais clientes veñen de Asturias. Mentres que como cooperativa, estamos a dirixirnos ó mercado internacional e ó mercado gourmet e delicatessen. En Galicia quedaría unha pequena parte da produción.
-¿Tratan de abrir o produto a novos mercados?
-Estamos a traballar nun plan de internacionalización a través do programa Galician Gourmet Extravaganza.
-¿En qué consiste este proxecto?
-É unha iniciativa que nos axuda a dar visibilidade ós nosos produtos no estranxeiro.
-¿Onde foron en anteriores edicións?
-Xa estivemos en Bruxelas e Berlín. E o vindeiro 3 de outubro iremos a Londres.
-¿Axudoulles o feito de ter participado nas dúas edicións anteriores?
-Si que nos axudou. Fanse contactos, ensinas o produto a nivel europeo, sempre é interesante. A procura de novos clientes sempre é interesante.
-¿Como afecta na internacionalización do produto o seu transporte?
-Polo menos, a faba non ten que transportarse en envíos refrixerados. Pero si atopamos certos problemas loxísticos. Depende tamén co tipo de intermediario co que se trate.
-¿Qué teñen preparado para a Feira da Faba do vindeiro fin de semana en Lourenzá?
-Teremos instalado un stand no que se poderá desfrutar a degustación dos nosos produtos. Presentaremos a nova oferta en conserva, as cales están a ter unha boa aceptación.
-Comercializan conservas empregando como base a faba.
-Ademáis da venta de faba dun xeito tradicional ofrecemos unha variedade de elaborados en conserva. Trátase de latas de conservas de 400 e 800 gramos.
-¿Qué tipo de receitas introduciron nesta nova oferta?
-Son latas listas para o consumo. Preparamos Fabas de Lourenzá con bacallao, setas e polbo. Con introducir a lata dez ou quince minutos ó baño maría xa estaría preparada e l istapara o seu consumo.
«A colleita deste ano está moi atrasada. Aínda non recollemos ningunha en seco»
«Elaboramos latas en conserva de fabas con bacallao, setas e pulpo, listas para o consumo»