Mañán, xoves, arranca a festa, coas parcelas xa cubertas ó 90%
23 jul 2014 . Actualizado a las 22:43 h.Todo está listo para a «Romaría do Monte Castelo» de Burela, que un ano máis congrega a multitude de veciños e mariñanos que ocuparán as súas parcelas dende o 24 ata o 27 de xullo. Marcos Vázquez é o presidente da asociación «Amigos do Monte Castelo» que organiza a tradicional festa por decimoquinto ano consecutivo.
-¿Cal é a esencia desta romaría?
-Xuntarse no monte catro días, acampar alí e comer todos xuntos. É unha tradición moi bonita.
-¿Xa están todas as parcelas cubertas?
-Estamos ao 90% aproximadamente. Moitas das parcelas xa se gardan de un ano para outro.
-¿Esperan máis xente que o ano pasado?
-Sí, porque este ano o venres é festivo e iso axuda para que a xente se achegue. Ademáis o ano pasado coincidiu co accidente do tren en Santiago, e aínda que non nos afectase directamente suspendéronse moitas actividades.
-¿Cómo se comportan as novas xeracións nesta festividade?
-Hai moita participación de xente xoven. Ademáis, este ano incorporamos á nosa asociación dous rapaces que aportan ideas frescas para que a romaría se adapte a tódolos públicos.
-¿A parcela é gratuita?
-Cobramos unha cantidade simbólica para gastos varios e orquesta, ademáis de poñer unha fianza no caso de desperfectos nas parcelas.
-¿Cal é o programa?
-O xoves arrancamos ás 20.00 horas ca misa na Igrexa da Vila do Medio e a continuación subida da imaxe. Ás 22.30 horas haberá unha chicharrada co tradicional chupinazo para despois dar lugar á verbena a cargo de Dúo a Cine. O venres podemos destacar os xogos para nenos que se celebrarán pola tarde e a «Festa do Marisco» da que se pode disfrutar ben no monte por 15 euros a ración ou ben na «cafetería Vistalegre», na «cervecería Kiko» ou na «Boasmigas» por 13 euros. E por suposto a verbena que protagonizará a orquesta Asiria e o dj Chente. O sábado celebraráse o concurso de casetas, (con premio para as mellores), pasamesas, e verbena a cargo da orquesta Fantasía. E para rematar, o domingo terá lugar a tradicional misa que será ás 12 horas (ó contrario do que pon no programa) e a sesión vermú ofrecida polo Trío Areal.