Piden en Baralla un fondo municipal de emerxencia para casos de violencia de xénero

Con motivo do Día Internacional da Violencia de Xénero, o próximo 25 de novembro, o grupo nacionalista de Baralla ten previsto presentar no próximo pleno unha moción na que solicita do Concello a creación dun fondo municipal de emerxencia para facer fronte a posibles casos de violencia contra a muller. O voceiro do BNG, Xosé Manuel Becerra, explicou que o seu grupo considera necesaria «unha partida específica nos orzamentos para tal fin, que sirva para atender os casos de mulleres vítimas de violencia de xénero no Concello, que de maneira urxente poidan precisar axuda».

Becerra destacou a importancia da Lei Galega para a Prevención e Tratamento Integral da Violencia de Xénero. «A realidade amosa que o problema pode xurdir en calquera momento e en calquera sitio», sinalou o concelleiro nacionalista, que recordou que que non hai un só euro para este fin nos orzamentos do Concello que dedica ademais «unha mínima partida de fondos a servizos sociais».

O voceiro do BNG tamén denunciou o retraso do Concello na posta en marcha das obras da área fluvial. «Hai que ter ben pouca seriedade para dicir que se atrasaron as obras da área fluvial por culpa da instalación eléctrica cando todos os veciños saben que leva vinte anos prometéndoas e outros tantos sen facelas», denunciou publicamente o edil.