O traxecto de Monforte a Folgoso pola Pobra do Brollón é de pouco menos de 50 quilómetros. Para ir de Monforte a Folgoso por Quiroga hai que percorrer 7,4 quilómetros máis. A pesar da diferenza na lonxitude, a primeira destas rutas pode resultar máis ardua de percorrer debido á estreitez da estrada e ás numerosas e pechadas curvas que se suceden durante unha grande parte da ruta.
A ruta rexistra hoxe unha circulación moi escasa, a pesar dos problemas que representan para o tráfico as obras en curso da estrada de Quiroga a Folgoso. Nun día laborable, non é raro facer unha boa parte do traxecto entre Brollón e O Courel sen encontrarse praticamente con ningún outro automóbil. Esta tranquilidade podería favorecer o seu uso como ruta turística, ao igual que a grande variedade paisaíxistica que se pode observar ao longo do percorrido.