O Concello da Pobra do Brollón iniciou o reparto de comida a domicilio dentro do programa de asistencia Xantar na casa, financiado polo Consorcio Galego de Servizos de Igualdade e Benestar, do que se benefician seis veciños do municipio en situación de dependencia. A partir de agora, estas persoas recibirán cada luns na súa casa un lote de comidas preparadas para consumir ao longo da semana. Nalgúns casos foi preciso proporcionarlles un forno microondas ou un refrixerador para preparar ou conservar estes alimentos.
O alcalde, José Luis Maceda, sinala que o programa tivo unha boa acollida no municipio. «De feito, apuntáronse catorce ou quince persoas e as que non puideron ser incluídas no servizo quedaron nunha lista de espera por se algún dos beneficiarios se dá de baixa», explica. O prezo de cada menú é de 7,50 euros, dos que 3,50 son achegados pola Xunta, dous polo Concello e outros dous polo usuario.
Pantón e Monforte
Na zona sur da provincia tamén están incluídos neste programa os concellos de Pantón e Monforte. No primeiro caso, o servizo de menús a domicilio comezou a funcionar o pasado día 10 e beneficia a unha decena de veciños. En Monforte, os servizos sociais do Concello están seleccionando actualmente as persoas que poderían beneficiarse do novo servizo.
O programa Xantar na casa foi concedido a dezasete municipios da provincia, pero aínda non se puxo en funcionamento en todos eles. A Xunta ten a intención de ampliar este servizo de atención a persoas dependentes á totalidade dos municipios galegos.