Un Castañazo para saltar

Xa está listo en cartel do Castañazo Rock deste ano. A principal atracción serán os inclasificables The Real McKenzies, canadenses enganchados ao mesmo tempo ao punk e á tradición escocesa. Tocarán a noite do día 1, e ademais deles haberá baile desenfreado con Skacha, Skarnio e os asturianos Skama a Rede, grupos todos eles abonados, claro, ao ska .

Os organizadores do festival púen aínda algúns detalles, pero as grandes liñas do programa xa están definidas, e non quedan unicamente no concerto que pechará o día. O ano pasado, o que trouxo a resurrección do Castañazo Rock logo de anos de silencio, centrouse no aniversario do rock bravú e tivo como principal atractivo, con permiso do concerto, unha mesa redonda con protagonistas daquel movemento musical nacido nos primeiros noventa. Este ano, o principal atractivo fose do escenario serán os talleres de guitarra, baixo, batería e produción musical. O de guitarra impartirao Alberto Cereijo, dos Suaves; o de baixo Pedro Feijoo, de Lamatumbá; o de batería Fran Amil, dos Tres Trebóns; e o de produción musical Javier Abreu, responsable entre outras cousas do primeiro disco dos Piratas. a inscrición está limitada a quince persoas por taller. O prazo para apuntarse aínda non está aberto.

A terceira pata do programa pona unha sesión de xogos bravús, que se celebrará a partir das seis da tarde no mercado gandeiro. O campionato será por grupos e inclúe lanzamento de boina, «turra-soga», «corrida de leiteiras» e «chote de esterco».