«O plan xeral é fundamental»

Entrevista | Roberto García

• Autor del comentario:

  Localidad:

  c.?s. | carballo

• ImprimirVolver

Como enxeñeiro agrónomo que é, Roberto García, o novo candidato do BNG en Malpica, coñece ben o campo. Pero non só o medio rural, xa que dende hai semanas reúnese con todos os sectores da localidade para coñecer a fondo os problemas do municipio.

-¿Que foi o que lle moveu a encabezar a lista do BNG?

-Chegoume a hora, por idade, por sentimentos, por un montón de circunstancias.

-¿Por que co BNG e non con outro?

-Vou a empezar como independente, pero penso que os galegos temos que mirar cara ao noso e nese senso o BNG encaixa moito mellor coas miñas ideas porque pensa só en Galicia, sen medo a que ninguén lle diga o que ten que facer dende Madrid.

-¿Que proxectos ten en mente para Malpica?

-O noso pensa en cousas básicas para que o Concello teña ben os pilares. O máis importante é crear emprego, e por iso o polígono industrial é básico. Tamén é imprescindible para o desenvolvemento de Malpica unha galescola e un centro de atención á terceira idade. Son dous servizos básicos para que a xente se asente en Malpica, ao igual que as vivendas sociais. Non son ideas novedosas, senón necesarias.

-O urbanismo é un tema moi sensible en Malpica. ¿Cómo lle fará fronte?

-A xente ten que sensibilizarse de que é moi importante poñerlle orde, e iso require moitos esforzos, moitas reunións, porque hai moitos intereses e é moi delicado. Hai que poñer orde para que non haxa inseguridade para os promotores, nin para o que compra. O plan xeral é fundamental.

-As eleccións estarán moi reñidas, pois concorren seis grupos. ¿Que resultados agarda o BNG?

-Un vai ás batallas con ánimo de gañar sempre, pero creo que en Malpica, hoxe por hoxe, ninguén se vai comer o mundo. Imos coa confianza de gañar, pero se non é así haberá que sentarse a falar cos demais para poder afrontar o Concello coas maiores garantías posibles e coa mayor estabilidade.

-¿Por que lle deberían votar os veciños?

-No sector do campo coñécenme bastante ben, e saben que eu nunca lle dou as costas aos problemas e, se teño que tomar unha decisión, tómoa, sempre pensando no ben da maioría. Os gobernantes non poden quedar ben con todo o mundo e non me vai a queimar a man á hora de tomar decisións en asuntos que son básicos para o pobo de Malpica.