Parada de Montes busca o seu vello reloxo de sol

En directo | Espolio do patrimonio etnográfico
Veciños dunha aldea da Pobra do Brollón difunden en Internet a imaxe dunha peza histórica roubada

• Autor del comentario:

  Francisco Albo

  Localidad:

  monforte

• ImprimirVolver

? espolio do patrimonio histórico non afecta só aos obxectos artísticos gardados en igrexas e capelas rurais. Os veciños de Parada de Montes, na Pobra do Brollón, víronse privados dun reloxo de sol que estaba instalado desde hai moitos anos nunha rúa da aldea. Hai aproximadamente un mes, a peza desapareceu do lugar onde se encontraba, o muro dunha antiga vivenda abandonada que se derrumbou en grande parte en tempos recentes.

O reloxo, de feitura moi sinxela e labrado nunha laxe de pizarra, posuía un importante valor sentimental para os veciños da localidade, ademais do seu notable interese etnográfico. Non se pode precisar con exactitude a antigüidade da peza artesanal pero, polo que se sabe, levaba indicando as horas aos habitantes de Parada de Montes desde hai bastantes xeracións, talvez desde hai un par de séculos.

Algúns veciños que conservaban fotografías do reloxo están a difundir a súa imaxe en diversas páxinas de Internet. «A idea é intentar recuperalo e, se non é posible, ao menos que a xente que o roubou o teña complicado para vendelo ou para poñelo á vista, que a xente que o vexa saiba que é roubado en Parada de Montes», explica unha veciña. A web do profesor monfortino José Ramón Casanova foi unha das primeiras que divulgaron a imaxe.

En canto aos posibles autores do roubo, un dos habitantes de Parada de Montes cre que puideron ser os ocupantes dun par de coches -un deles de cor azul, polo que recorda- que pasaron pola localidade nos días en que desapareceu o reloxo. Os responsables municipais opinan que esas persoas poden ser tamén os autores dalgúns pequenos furtos rexistrados ultimamente en diversas localidades do municipio.