As xornadas culturais de Carnota tratarán sobre a tradición oral galega

O ciclo de charlas organizado polo colectivo Canle de Lira desenvolverase os días 18, 19 e 20
Méndez Ferrín, Marcial Gondar e Antón Cortizas atópanse entre os conferenciantes

• Autor del comentario:

  J. M. Sande

  Localidad:

  corresponsal | carnota

• ImprimirVolver

SIMÓN BALVÍS

A asociación cultural Canle de Lira, en colaboración co Concello de Carnota e coa Consellería de Educación, promoven a celebración da quinta edición das Xornadas internacionais da cultura tradicional, que nesta ocasión se celebrarán os días 18, 19 e 20 deste mes. O tema elixido para esta cita foi a literatura de tradición oral en Galicia.

O programa de actividades previsto comezará a desenvolverse o mediodía do 18, coa ponencia A cultura popular galega hoxe: entre o conto, a cantiga e o folclore do papeleo , que correrá a cargo de Xosé Manuel González Revoredo. Xa pola tarde, Marcial Gondar disertará sobre a tradición oral.

Este primeiro día tamén se ofrecerá aos cursillistas a charla titulada O pé da Laxa da Moa: literartura oral carnotán , na que intervirá Antón Cortizas Amado. A xornada rematará con relatos sobre a regueifa, que presentarán Xesús de Ventura e María Fetós.

Os actos do día seguinte comezarán coa conferencia As lendas da auga , que será ofrecida por Charo Soto Arias. Máis tarde, Manolo Rico disertará sobre Da música tradicional ás novas aportacións musicais . A sesión matinal rematará coa intervención de Francisco Brea, quen falará da posta en valor do patrimonio inmaterial.

Pola tarde, Camino Noia ofrecerá a conferencia O conto popular galego , e Xosé Luís Méndez Ferrín abordará aspectos vencellados coa literatura e a tradición oral.

A xornada de clausura iniciarase coa ponencia A pervivencia do cancioneiro tradicional , a cargo de Baldomero Iglesias e Xosé Luís Rivas. Á súa conclusión daráse por rematado o ciclo, presentando aos asistentes o volume literario das charlas ofrecidas o pasado ano no marco das xornadas culturais.