Toxosoutos convértese en referente da banda deseñada con «Os barbanzóns»

O primeiro número da serie ambientada no castro de Baroña presentouse en Porto do Son
O autor do guión e dos dibuxos é o ilustrador vigués Pepe Carreiro

• Autor del comentario:

  Sara Ares

  Localidad:

  corresponsal | noia

• ImprimirVolver

ARES

A decidida e arriscada aposta de Toxosoutos nestes anos pola difusión da banda deseñada fai que a editorial noiesa estea a acadar nese eido a condición de referente galego. O seu último proxecto douse a coñecer onte no auditorio de Porto do Son. Trátase dunha serie de cómics, ambientados no castro de Baroña, que se agruparán baixo o denominador común de Os Barbanzóns , que é o nome dunha familia que reside no poboado prerromano.

O primeiro número da colección titúlase Baroña ou morte , do cal Toxosoutos sacou unha tiraxe de dez mil exemplares, en galego e castelán.

Na presentación, o autor dos guións e dos debuxos, o vigués Pepe Carreiro, quixo rachar cos falsos mitos de que a banda deseñada está pensada só para nenos e de que é un paso intermedio para acceder á literatura ou a outras artes. Ademais de reivindicar a entidade propia do humor gráfico, describiu e debuxou cada un dos protagonistas das súas viñetas.

Sobre o contido e o estilo, o ilustrador confesou: «Son personaxes cómicos, sarcásticos, paródicos; cunha perspectiva nada historicista e que se contaxian, como ocorre no caso de Con, da neurose dos dirixentes políticos reais, como Aznar, Bush e Blair».

O libro poderá adquirirse nas librerías por dez euros. O segundo número da serie está previsto que saia do prelo a mediados de maio e, nel, os membros do clan dos Barbanzóns viaxarán a Irlanda.