ACOSO DOS PROXENITORES Julio Díaz: «Hai pais que veñen cambiar as notas do seu fillo ou o currículo»

A convivencia nas aulas galegas «é unha marabilla». Así o di o presidente do sindicato educativo ANPE despois de presentar un informe sobre o defensor do profesor. Malia esa reflexión xeral, é preocupante o aumento dos expedientes disciplinarios a alumnos da etapa de primaria, e dos casos de ameaza e acoso aos docentes por parte dos pais.

-¿Como está a conflitividades nas aulas?

-É unha marabilla dar clase aquí. Pero estamos moi preocupados polos expedientes a alumnos en primaria. Non é normal que se lle abra a un alumno de dez ou once anos, cando un expediente só se inicia por un motivo moi grave a esas idades. Nesa etapa non debería abrirse ningún. Outro problema é o dos pais, hai algúns que veñen protestando e queren cambiar as notas dos seus fillos, e mesmo dinche que o currículo non é o axeitado. O problema do idioma tamén nos está xerando conflito cos pais. Meteuse un problema nos centros que non existía. E non é culpa dos que están agora. Xa se provocou conflito cos de antes e cos de agora. Os docentes chaman moitas veces a Madrid porque non queren que se saiban os seus problemas no centro.

-¿Por que esa intromisión dos pais?

-Agora hai unha maior implicación das familias, e iso é bo. Pero é verdade que ten que ser unha liña de participación, non de imposición. O médico dáche un diagnóstico e punto, pero aquí de educación e de fútbol sabe todo o mundo. Os pais queren o mellor para os seus fillos, pero extralimítanse e fanse grupos de opinión sen coñecer a realidade do centro. Un pai diante do seu fillo nunca pode desautorizar a un docente.

-E cos alumnos, ¿diminuíu a convivencia?

-Houbo casos de agresións en Ourense e de gravacións, pero en xeral esas cousas xa pasaban hai anos. O que non pode ser é que o profesorado vaia de colega dos seus alumnos.

-¿Cales son os problemas máis frecuentes?

-Pelexas entre eles, destrozos ou condutas de faltas de respecto ao profesor.

-¿Hai un perfil?

-Non, non hai un perfil de rapaz conflitivo, pero si etapas, que son primeiro e segundo da ESO. Unha porcentaxe altísima de profesores xubílanse desencantados porque están na aula con rapaces de entre 13 e os 15 anos que non queren estar. É un problema grandísimo ter alumnados desmotivados.

-¿Con pais conflitivos hai fillos conflitivos, ou non ten por que haber relación?

-Si que está relacionado. Ademais, cando un pai fai unha protesta, como son moi corporativos, os equipos directivos teñen que facer verdadeiros equilibrios para ver a quen lle dan a razón.