«Non hai un só núcleo onde se tomaran medidas preventivas contra o lume no último ano»

Amosando un ton moi crítico en todos os asuntos, o líder do PSdeG considera que o arranque do novo curso político servirá para constatar o «fracaso» do Goberno de Feijoo, que ve notorio no capítulo dos incendios.

-¿Como afronta o PSdeG o comezo do novo período de sesións?

-Con ilusión renovada e coa confirmación de que, logo dun ano e medio, Feijoo non ten un proxecto para o país, porque vemos que preside un Goberno escapista e os grandes problemas seguen aí.

-O presidente da Xunta ven de considerar «óptimo» o funcionamento do operativo de incendios. ¿Que lle parece?

-El di que todo vai de marabilla, namentres Ourense arde estes días polas catro esquinas. Os incendios estanse apagando con retraso e ocultalo non serve de nada. Feijoo pasou de ensinar os mapas da NASA no 2006 a ocultar os mapas de incendios de Medio Rural e a silenciar aos medios públicos.

-¿Que mudou na loita antilumes?

-Non hai nin un só núcleo habitado en Galicia onde se tomaran medidas preventivas no último ano. Isto é grave, porque as aldeas están cada vez máis abandonadas, con árbores que entran nas casas converténdoas nun polvorín. Non se limpou e o Goberno estivo escapado.

-¿Ve necesario afondar máis nos feitos do incendio de Fornelos?

-Non é necesario, é ineludible por respecto ás familias e á cidadanía. O responsable da Xunta é o seu presidente e non se pode despachar todo isto dicindo que foron os propios brigadistas os responsables da súa morte.

-¿Que presentimento ten dos Orzamentos da Xunta para o 2011?

-Van a ser a confirmación do fracaso do proxecto de Feijoo para Galicia. Dos compromisos dos que falou sendo candidato, non vai cumprir un, porque a licitación de obra pública cae a mínimos históricos, están despedindo médicos a ducias e a cerca de mil profesores. As axudas á dependencia van a mermar e as políticas de emprego non existen.

-Pero o escenario de recortes é xeneralizado. O Goberno de Zapatero tamén é afeccionado ás tesoiras....

-A diferenza é que dende Madrid recórtase obra pública, pero non a estratéxica. En España estamos a sufrir un proceso de adaptación, mesmo Alemania acaba de retrasar a idade de xubilación aos 67 anos, e o que compre é tomar medidas equilibradas. As decisión do Goberno central, pese a ser dolorosas, están sendo entendidas pola cidadanía.

-¿Non cree que o desgaste de Zapatero pode pasarlle factura ao PSdeG?

-Non o creo. Temos datos que indican que o PSdeG vai revalidar as cidades onde goberna, porque os cidadáns saben discernir ben entre a escena estatal e a xestión dos seus alcaldes.

-¿Vai facer cambios no grupo, xa que hai deputados que se ven relegados?

-Os cambios non están na axenda. Estou satisfeito de como funciona o grupo.

-A elección de candidatos complícase en cidades como Pontevedra...

-En Pontevedra e outras localidades están traballando unidos. Eu non teño a máis mínima preocupación porque van facer unha gran proposta.

-Louro, Casal, Meijón, Valcarce, ¿ten algunha preferencia?

-Eu teño un tremendo respecto por un equipo de persoas que levan gobernando en Pontevedra dende hai 8 anos.

-¿Hai que cambiar os pactos co BNG como din algunhas voces do PSdeG?

-Como todo, hai que agardar ás eleccións porque os cidadáns son os que deciden quen goberna, pero os pactos gozan de moi boa saúde.