CANGAS Dezaseis detidos por obstaculizar as obras do porto deportivo en Cangas

A Garda Civil detivo onte a 16 persoas que trataban de impedir o paso dunha pa ao porto deportivo que constrúe Marina Atlántica en Cangas, fronte á antiga nave conserveira de Massó.

Desde primeira hora da mañá, un grupo dunhas quince persoas sentaron no viario diante do camión que transportaba a máquina, entre eles unha concelleira de ACE (Alternativa Canguesa de Esquerdas), grupo que forma parte do goberno local e que desde fai un par de meses presiona sen éxito á alcaldesa, a nacionalista Clara Millán, para que decrete a paralización das obras.

Os concentrados negáronse a abandonar o lugar, polo que sobre as doce do mediodía os axentes da Garda Civil, que formaban un continxente que superaba en número aos manifestantes, empezaron a desaloxar un a un aos concentrados.

Comezaron coas mulleres. Todas resistíronse con tenacidade, especialmente a citada concelleira. No medio da refrega, un axente propinoulle un porrazo nunha perna a un dos concentrados, a mesma na que hai uns anos tiveron que colocarlle soportes metálicos por mor dun accidente de moto. O ferido foi trasladado ao hospital en ambulancia, custodiado por unha patrulla da Garda Civil. Os demais foron levados ao cuartel de Cangas, onde xa estaba outra persoa que fora detida á primeira hora da mañá por atravesar o seu coche no viario de acceso á zona.

As últimas detencións foron as de varios mariñeiros da confraría canguesa, que reclama o dereito a pescar na zona, e a dunha muller recentemente operada que se apoia en muletas para andar. Resistiuse, empregando as súas muletas para evitar que a desaloxasen, aínda que finalmente foi levada polo aire.

Enfrontamento do goberno

O concelleiro de Urbanismo e líder de ACE, Mariano Abalo, instou á alcaldesa a pospor as súas vacacións, que proxecta iniciar esta semana, e convocar un pleno extraordinario para condenar a actuación policial e buscar unha solución ao conflito, que pasaría por paralizar as obras. ACE repudia a actitude da alcaldesa «por non mover un dedo» para evitar situacións como a de onte, e acúsaa de non mostrar sequera a súa solidariedade coa concelleira do goberno que preside que foi detida.

A alcaldesa entende que non ten competencias para parar as obras e aposta por pedir á Autoridade Portuaria, organismo que aprobou o porto deportivo, que rescate a concesión.

O concelleiro de ACE considera que ela é a culpable de que Cangas «estea gobernada» polos promotores do porto, en particular por Caixanova, accionista de Marina Atlántica, e «tomada» pola Garda Civil. Abalo chama á veciñanza a mobilizarse.