Os nenos de ata catro anos apenas son a metade que ao comezo da democracia

Cando Franco agonizaba, en novembro de 1975, case o 8% de todo o censo de Galicia ocupábano menores de catro anos, que sumaban ata 214.000 habitantes dunha comunidade que tiña entón tantos habitantes como agora: 2,75 millóns. A situación no 2007 é bastante diferente. Os nenos que non chegan a esa idade apenas superan os 103.000 e non supoñen nin o 3,8% do total dos empadroados.

A comparación, ademais, coa poboación en idade de xubilarse traza unha liña ben diferente: os que superan os 65 anos eran un 12% en 1975 e agora superan o 21%; os menores de 4 eran case ese 8%, e no 2007, a metade.

Con todo, hai motivos para pensar nun lento cambio de tendencia. Desde o ano 2001 rexístrase en Galicia un incremento da natalidade. Aquel ano, nesa franxa de idade, de 0 a 4, había apenas 85.000 galegos. Agora supéranse os 100.000. Ese algarismo salvouse no 2006 e volveuse a repetir no 2007. É algo que non sucedía desde mediados dos noventa. Unha gran parte dese fenómeno hai que atribuílo ás nais estranxeiras en tanto que os partos desas novas empadroadas multiplicáronse por dúas en apenas un lustro. Hoxe sete de cada cen alumeamentos teñen como proxenitora unha muller nacida fóra de España. É unha das vías de futuro.