Concentración ante a consellería e cortes de tráfico en Ourense

Unha representación de médicos de toda Galicia -medio centenar de facultativos- concentráronse onte ante a Consellería de Sanidade, mentres que outros profesionais reuníronse ante a Xerencia de Atención Primaria. En Ourense celebrouse unha concentración ante da delegación de Sanidade, con corte de tráfico incluído. Un grupo de médicos e enfermeiros percorreron parte da avenida de Zamora cunha pancarta na que se podía ler «Urxencias extrahospitalarias, solucións xa».

Na área sanitaria de Ferrol rexistráronse altos índices de seguimento do paro convocado, segundo os sindicatos. No centro Fontenla Maristany, de Ferrol, participou cerca do 50% do persoal, con cifras similares en Fene e Pontedeume. En Narón a participación chegou ao 75%, mentres que nas Pontes, Cedeira, Cariño e San Sadurniño superou o 90%, sempre segundo os convocantes. Ante o hospital ferrolán Arquitecto Marcide concentráronse máis de 150 traballadores. En Monforte, unha decena de persoas reuníronse media hora fronte ao centro de saúde, e en Carballo unha vintena de traballadores apoiaron o paro convocado polos sindicatos. En Vigo esperarán á reunión do martes para decidir se asumen a protesta.

Na Coruña, a reivindicación da sanidade pública coincidiu tamén coa concentración do persoal dos centros privados, que denuncian a ruptura das negociacións do convenio colectivo para o ano que finaliza.