O TEMPO Galicia vive un outono con extrema seca, inédito no último decenio

O verán do 2007 deixou unha certa sensación de desnorte en Galicia: temperaturas frías que non se recordaban desde 1988, precipitacións elevadas, encoros rebosantes de auga... E o outono deste mesmo ano vai por ese mesmo camiño, pero polo contrario: temperaturas suaves que invitan á camiseta e á praia e refachos de ata 20 días consecutivos sen que caia unha pinga do ceo. En números: en Ferrol no que vai a outono rexistráronse 3 días con choiva, pero menos de 8 litros recolleitos, cando a media en outubro é duns 120; en Ourense, noutros tantos días caeron 4 litros, e en Pontevedra en 20 días non viron choiva. É dicir, entre dez e vinte veces -segundo a estación de referencia- menos do habitual (a media dos últimos anos) a dez días de finalizar o mes.

Eses son os datos das estacións urbanas de Meteogalicia, o instituto climatolóxico galego, desde onde ven con sorpresa os números. «É algo moi infrecuente, inusual desde fai 10 ou 15 anos», opina Juan Taboada desde o observatorio dependente da Consellería de Medio Ambiente. «Se finaliza así [a previsión é que ata o martes o ceo siga despexado], este mes será extraordinariamente seco», completa.

Ao anterior hai que sumar un setembro tamén seco, con choivas puntuais en menos de cinco xornadas que reforza esa idea do, por agora, outono máis seco do decenio. «E non apareceu aínda ningunha fronte grande de nubes que sería esperable no outono», agrega o experto.

As consecuencias de dous meses secos nótanse xa en varios puntos: nos encoros de abastecemento das contornas urbanas, na calidade do chan e, consecuentemente, na situación da agricultura. Os pantanos atópanse hoxe ao 65% da súa capacidade e retrocederon 20 puntos desde que comezou esta, por agora, breve seca, na segunda semana de setembro. Hainos que están ao 33% da súa capacidade. Hai un ano a situación era diferente: contaban co 72% da súa almacenaxe e o mes de outubro dese 2006 moveuse en parámetros pluviométricos normais. «Para recoller uva ou pasear está moi ben que non chova, pero para nós era algo impredicible», admiten os traballadores do campo.