MERCADO LABORAL Galicia perdeu nun ano 11.985 mozos en idade de traballar

A Coruña | Galicia ten agora 11.985 mozos de entre 20 e 29 anos menos que hai un ano. O dato, recollido nas estimacións da poboación actual de España publicadas esta semana polo Instituto Nacional de Estatística (INE), reflicte a potencial forza de traballo que perde a comunidade, e que se dirixe, fundamentalmente, cara a Baleares e Canarias, onde hai unha gran demanda de traballadores do sector da hostalería e a construción, ou cara a países europeos como Portugal ou o Reino Unido, nos que existen pronunciadas carencias de profesionais sanitarios.

Ao contrario do que ocorre en franxas de idade inferiores, onde a crise demográfica de principios dos noventa é evidente, con descensos poboacionais nun ano de 3.652 habitantes de entre 15 e 19 anos, no caso dos mozos de entre 20 e 30 anos, o argumento da baixa natalidade para explicar a caída non se sostén.

Máis aló das razóns relacionadas coa escaseza de nacementos entre finais dos setenta e oitenta, as causas principais da recesión entre os mozos que acaban de terminar os seus estudos e están en idade de traballar son a fuga de cerebros, a realización de estudos de posgrao ou a procura dunhas mellores oportunidades de traballo.

Taxa de natalidade

Segundo os datos do Instituto Nacional de Estatística, o número de fillos por muller en Galicia era de 2,36 no ano 1977, unha proporción que se reduciu ata os 1,341 un decenio despois. E a cifra continuou en descenso, o que levou ao Goberno da Xunta a activar, xa a principios dos noventa, unha serie de políticas dirixidas a promover a natalidade, que comezaron a dar os seus primeiros froitos ao redor de 1997. Actualmente, a relación de nenos por cada muller está en 1,04, tras lograr recuperarse desde o 2002, cando estaba en 0,95.

De feito, segundo as estimacións da poboación actual de España, o número de nenos de entre cero e catro anos creceu no último ano en 1.913 persoas, mentres os de idades comprendidas entre cinco e nove creceron en 1.662. Non se pode dicir o mesmo entre os de dez e catorce, xa que agora hai 2.721 menos que en xullo do 2006.

Pero Galicia non é a única comunidade que sofre as consecuencias da escapada de mozas de entre 20 e 29 anos. Só cinco autonomías -Baleares, Castela-A Mancha, Melilla, Comunidade Valenciana e Murcia- gañan habitantes de entre 25 e 29 anos, mentres que no tramo de entre os 20 e 24, son as tres primeiras as únicas que incrementan a súa poboación.