Os pacientes piden cambios profundos na cúpula xestora da área Sanitaria

A chegada do novo xerente da área Sanitaria de Ferrol podería traducirse nunha «ampla renovación» do equipo directivo da institución. Esa posibilidade foi citada onte por varias fontes próximas a José Ramón García, o médico de Narón que foi confirmado o luns como novo responsable da área. García xa iniciou as xestións para a súa toma de posesión e onte entrevistouse con Alicia López, xerente de Procesos e directora en funcións da área en substitución de Lourdes Buxaderas.

A posibilidade de que se produza unha ampla renovación no equipo directivo da área non é vista con malos ollos entre as asociacións de pacientes da comarca. Todo o contrario, catro presidentes desas entidades onte consultados mostráronse partidarios de «cambios profundos» na dirección.

Nese desexo pesa o motivo aducido por Lourdes Buxaderas á hora de presentar a súa dimisión: «Problemas persoais». Esas palabras foron interpretadas como proba da existencia dun conflito interno no seo da dirección da área. É máis, segundo varias fontes Buxaderas tiña previsto facer cambios no seu gabinete, pero podería haberse visto sen apoios suficientes para iniciar a crise. Polo tanto, a renovación impediría que se repetisen as causas que a levaron a dimitir.

Cabe recordar que a anterior dirixente da sanidade ferrolá contaba cun amplo respaldo entre as asociacións de pacientes, que aínda onte lamentaban a súa decisión de irse xa que se estaban producindo avances bastante importantes».

Outra das causas citadas para explicar a dimisión de Buxaderas é que estivese en desacordo cos próximos orzamentos previstos para a área.

En todo caso, a opinión maioritaria é que se debe dar tempo ao novo responsable, José Ramón García, para que o seu proxecto produza resultados «concretos». Os catro presidentes antes citados non dubidaron onte en esixir á Xunta que se conceda «estabilidade» á nova dirección, para o que sería necesario un respaldo «inequívoco» desde a consellería.

Inestabilidade permanente

O problema é a «permanente inestabilidade» da administración sanitaria ferrolá, que tivo catro máximos responsables desde o 2004 (cinco contando a García). Pero, aínda por riba esa cifra, subliña un dos presidentes, «hai que acordarse de que a Buxaderas confirmouna a conselleira no cargo e, polo que dicían, tiñan a 'máxima confianza' nela. E hai que acordarse do caso de Ramos (Juan José Fernández, predecesor de Buxaderas), ao que confirmaron no cargo pouco antes de destituírlle. Os precedentes non son como para fiarse, a verdade».

Por outra banda, desde as asociacións de pacientes subliñan que «con cambios ou sen eles, a área segue sendo enormemente deficitaria», polo que subliñaron que a nova dirección «debería continuar» na liña marcada pola súa predecesora, que sempre se mostrou «moi esixente coa consellería á hora de solicitar máis fondos e recursos para a área de Ferrol». Recordan, por exemplo, as declaracións da anterior xerente nas que recoñecía o déficit de facultativos e doutro persoal sanitario na comarca e, especialmente, no Marcide.