economía doméstica A renda familiar galega empeza a converxer coa media española

A economía de Galicia crece lixeiramente por encima da media española e iso reflíctese xa, aínda que tamén timidamente, no peto dos cidadáns. A renda familiar dispoñible por habitante na comunidade galega no 2006 (11.833 euros) sigue sendo máis baixa que a do conxunto do país (13.309 euros). Hai unha diferenza do 11%, pero a brecha xa foi maior do que é. Así o revela o Atlas socioeconómico de Galicia 2007 elaborado por Sondaxe para Caixanova, no que as cifras da renda media por habitante recompiladas en municipios galaicos de máis de 10.000 habitantes confirman que a capacidade económica dos galegos acurtou distancias coa media española nos últimos cinco anos (un 15%) e que a converxencia está canalizada.

Por concellos, Ourense e Lugo son os máis ricos de Galicia, mentres que Boiro e A Laracha pechan a lista. Con todo, a maior capacidade de xeración de riqueza localízase na Coruña e Santiago de Compostela (con medias de valor engadido bruto por habitante superiores aos 23.000 euros).

O estudo socioeconómico aclara que, a pesar de que a concentración do poder adquisitivo localízase nas provincias do interior, o índice de envellecemento, a elevada taxa de dependencia e os menores niveis de produtividade confirman unha falta de desenvolvemento destas zonas, unha situación que leva tamén aos redactores do estudo a alertar do estancamento detectado nos municipios da Costa da Morte.

O informe socioeconómico recolle tamén a tendencia á recuperación dos índices de emprego en Galicia, e confirma a mellora da taxa de paro rexistrada no 2007 en relación aos dous exercicios anteriores. O repaso polos municipios galegos de máis de 10.000 habitantes localiza o menor índice de desemprego por habitante en Lalín (4,15%); e o maior, en Verín (10,1%); mentres que por provincias, Pontevedra leva a peor parte cunha taxa de paro do 6,6%, 0,6 puntos por encima da media galega e 1,5 puntos máis que a cifra media nacional. ? Entre os datos novos que incorpora este ano o estudo, destaca o relativo a superficie industrial, un indicador liderado polos municipios da Coruña e Vigo con máis de dous millóns de metros cadrados hábiles.?

Gran dependencia

A realidade socioeconómica galega está tamén cada vez máis condicionada pola súa estrutura poboacional, na que sobre outros parámetros destaca o feito de que a dependencia do conxunto dos habitantes sobre o colectivo traballador é sensiblemente maior que no resto do país. Mentres que en España a taxa de nenos e maiores que dependen economicamente das persoas con traballo é dun 44,9%, en Galicia é de catro puntos máis. A provincia de Ourense é na que ese desequilibrio é maior, ao rexistrarse por cada catro persoas en idade de traballar outras seis que non chegaron ou superan xa esa etapa. Monforte, Vilalba e O Carballiño rexistran o grao de maior dependencia en Galicia reflectindo unha situación máis marcada, polo xeral, no interior da comunidade. As Pontes, Arteixo e Gondomar é onde os traballadores teñen menos porcentaxe de poboación sen emprego baixo a súa responsabilidade, situación que nas grandes cidades encabezan no mesmo sentido Santiago, Vigo e Pontevedra.

Ademais do grao de dependencia, influenciado polo envellecemento da poboación, a inmigración tamén está a condicionar a economía local, facendo que, por exemplo, achegue novos traballadores e veciños de xeito moi destacado en puntos como Ames, Sada, Arteixo e Tomiño, mentres que a emigración resta man de obra de xeito drástico en Porto do Son, As Pontes, Fene, Bueu e Ferrol.