Medio Ambiente abre nun mes dous expedientes por verteduras en Lalín

A Consellería de Medio Ambiente abriu no mes de abril dous expedientes por verteduras ao río Asneiro e ao regacho de Abeleda en Lalín. Unhas verteduras achacadas ás obras do AVE e aos que se podería sumar, polo menos un máis por mor das últimas verteduras denunciadas polo Concello de Lalín e que obrigaron aos responsables municipais a cambiar o bombeo da auga por mor da contaminación sufrida na canle.

Segundo Medio Ambiente, na actualidade hai dous expedientes abertos. O primeiro é de data 11 de abril. A empresa Ferrovial, adxudicataria dos traballos, presentou xa alegacións e nestes momentos están en estudo e espérase que en breve a consellería pronúnciase sobre unha sanción.

O 29 de abril os técnicos de Augas de Galicia realizaron unha inspección á zona, neste caso, ao regacho de Abeleda, de onde ao parecer producíanse as verteduras. Por mor desta visita a Consellería de Medio Ambiente ten previsto incoar un novo expediente sancionador.

Onte Medio Ambiente aínda non tiña noticias dunha nova denuncia presentada polo Concello de Lalín que o venres constataba que o río baixaba moi turbio e con abundantes restos de terra.

Unha situación que obrigou aos responsables municipais a solicitar á empresa concesionaria do servizo de subministración de auga Espiña e Delfín o cambio do bombeiro da auga de Botos a Pozo Negro. Unha decisión que se adoptaba para garantir a potabilidade da auga.

O Concello de Lalín anunciou que cursaría a denuncia ao Seprona, a Augas de Galicia e ás consellerías de Medio Ambiente e Sanidade a fin de que tomasen medidas.

De momento os que xa foron pola zona foi unha patrulla da Garda Civil de Lalín que se achegou o venres a inspeccionar a canle fluvial despois de que o técnico de Medio Ambiente do Concello de Lalín informáselles da situación e desta vertedura por teléfono.

Pola súa banda, os membros do Seprona continúan realizando controis diarios na zona para constatar o estado do río e cursar os pertinentes informes. As visitas do Seprona veñen realizando de forma continúa desde o 29 de abril por mor dunha chamada dun veciño ao 112 alertando de verteduras no río. Nesta ocasión o río baixaba branco, unha cor achacada aos restos procedentes das obras do AVE.

Nos días seguintes os axentes do Seprona da Garda Civil puideron constatar que continuaron producíndose as verteduras. A última vertedura, o pasado venres, produciuse no tramo dos Muíños, en Vilanova e a estación de Botos.

Desde a Consellería de Medio Ambiente apúntase que se ten coñecemento da situación do río na zona e que se están levando a cabo todas as dilixencias administrativas necesarias para emendar a situación e depurar responsabilidades.

Unhas verteduras que nas últimas semanas viñéronse achacando a residuos procedentes das obras para a construción do corredor ferroviario do AVE e que se produciron en diferentes tramos do río.