A Estrada Un pescador asturiano captura no Ulla un «campanu» de 90 centímetros e case oito quilos

Un pescador asturiano capturou onte no río Ulla o campanu da tempada, un salmón de 7,825 quilos de peso e noventa centímetros de lonxitude. O exemplar foi pescado na ribeira estradense do coto de Ximonde, no posto do Viso. O afortunado foi Celestino Faez Vilar, un deportista da localidade asturiana de Muros de Nalón que se desprazou ex profeso ao municipio estradense para probar sorte o primeiro día da tempada. E tívoa. Con todo, o de Tino Faez non foi só cuestión de fortuna. O pescador ten ás súas costas unha dilatada experiencia. Naceu á beira do Narcea, un dos mellores ríos salmoneros da península, e aos 15 anos xa empezou a tirar a cana. O seu amigo Jaime Menéndez Corral , hoxe alcalde do concello asturiano de Soto del Barco, enganchouse tamén á pesca e xuntos decidiron peregrinar de coto en coto. Os de Asturias coñécenos case como o seu propio barrio. Pescaron no Cares, no Sela e no Narcea e tamén probaron sorte en Galicia, no Eo, o Masma e o Ulla.

O coto de Ximonde visitárono o ano pasado por primeira vez. Pescando en Asturias coñeceron a uns afeccionados composteláns que lle recomendaron este enclave privilexiado. Os asturianos fixéronlles caso. Tino Faez capturou o quinto salmón do 2007 ademais de facer moitos amigos e de gozar da gastronomía local. Este ano, regresou case por casualidade. Os propietarios da casa de turismo rural na que se aloxaron o ano pasado informáronlles da posibilidade de conseguir permisos de pesca para a ponte festiva. Os asturianos decidiron volver. Tino Faez conseguiu licenza para a apertura de tempada e o seu compañeiro Jaime Menéndez probará sorte hoxe.

O pescador do campanu calcula que ao longo da súa vida pescou entre un centenar e un centenar e medio de salmóns. Con todo, recoñece que o exemplar sacado onte foi un dos que máis guerra lle deu. Foi madrugador e peleón. «Ás 9.00 craveino e ás 9.20 saqueino», explica o deportista. «Non foi fácil. Foi unha loita de poder a poder. Era un sitio con tiro de augas e o salmón cravábase no fondo e non se movía», relata. «Só unha vez no Cares, que é un río de augas moi frías, dei cun exemplar tan difícil como este», sinalou Tino Faez.

O salmón foi un exemplar salvaxe ao que o deportista tentou cun cebo natural con dúas lombrigas de terra e unha quisquilla. «A quisquilla collina na praia de Aguilar, en Muros de Nalón, que ten bandeira azul, e prepareina eu mesmo», comentou o pescador. Ao campanu gustoulle o camarón e ao seu captador gustoulle o coto. «Fixemos o venres dúas horas e media de coche e gastamos corenta euros de gasoil, pero vale a pena. Hai que mirar moito por este coto, que é unha xoia», declarou.

Os asturianos teñen previsto regresar a Ximonde a mediados de xuño. Namentres, teñen claro que facer co campanu . Se a captura fose en Asturias, o primeiro exemplar podería venderse. «Un como este podería valer 18.000 ou 20.000 euros, pero nós aquí xa sabiamos ao que viñamos», indicou satisfeito.

O pescador levará o trofeo a Asturias para degustalo cos seus amigos preparado por un restaurador de Pravia especialista en salmón que acaba de conseguir un premio nacional de cociña.