ecena O teatro galego protagonizará en Madrid o Festival das Autonomías

Nun Madrid de musicais e Hamlets, o teatro galego tentará abrir un oco ao longo do mes de marzo ao protagonizar con oito montaxes o Festival das Autonomías, que este ano acada a súa decimocuarta edición.

Desde os primeiros días de marzo, oito propostas entre estreadas durante este último ano polas compañías galegas terán dous días cada unha de representación no teatro do Círculo de Bellas Artes, dentro dun cartel que este ano contará, ademais, con compañías estremeñas e madrileñas.

A presenza das compañías galegas en Madrid, coa participación da Agadic, pretende ofrecer un panorama amplo do teatro profesional galego para conformar a oferta máis ampla das realizadas na capital de España desde a existencia, cando menos, do teatro profesional en Galicia.

As oito compañías que participarán no festival son, por orde de intervención, Teatro do Atlántico, con Unha primavera para Aldara; Teatro D2, con Flores migratorias; Teatro de Ningures, con Bailadela da morte ditosa; Teatro do Noroeste, con Extrarradios; Teatro do Morcego, con O club da calceta; Centro Dramático Galego, con Noite de Reis; Producións Excéntricas, con Obra, e Sarabela Teatro, con Margar no pazo do tempo, unha selección que repara máis nas montaxes de maior formato entre as estreadas durante este último ano en Galicia.

Cada unha das compañías ofrecerá dúas funcións no programa do festival. O certame, que comezou a celebrarse en 1996, cumpre na capital madrileña un papel con dúas direccións: permite que os espectadores teñan acceso a unhas producións que, doutro xeito, non chegan nunca aos escenarios madrileños; por outra banda, serve de escaparate para a exhibición das compañías e dos profesionais na cidade con maior movemento e mercado teatral na península Ibérica.