conferencia Portugal abre o seu Parlamento para discutir o Acordo Ortográfico

A Assembleia da República de Portugal será sede mañá dunha Conferência Internacional/Audição Parlamentar sobre o Acordo Ortográfico da Língua Portuguesa . Nunha xornada completa, en sesións de mañá e tarde, a tribuna parlamentaria estará ao dispor de escritores, lingüistas, académicos, asociacións profesionais e representantes de entidades e institucións con interese directo no asunto, que exporán as súas razóns a favor e en contra nun asunto que suscita grande polémica na sociedade portuguesa e está pendente de entrar en vigor desde 1990, para unificar a ortografía para os 230 millóns de habitantes dos países lusófonos. O Goberno de Portugal pretende a súa aplicación progresiva en seis anos.

O acontecemento será inaugurado por Jaime Gama, presidente da Cámara. Pola mañá intervirán catro oradores convidados, de institucións con implicación moi directa: Adriano Moreira, presidente da Academia de Ciencias de Lisboa; Evanildo Bechara, da Academia Brasileira de Letras; Albertino Bragança, en representación do Goberno de São Tomé e Príncipe; e Amélia Mingas, presidenta do Instituto Internacional da Língua Portuguesa.

Desde as 14.30 horas será a ocasión para 37 oradores, segundo o programa avanzado, representantes dos países de lingua oficial portuguesa, alén de dous galegos, e un que se achegará desde Estados Unidos.

Desde a Presidencia da República de Portugal a outros representantes de gobernos nacionais e rexionais, alén de profesorado de universidades e escritores, asociacións especializadas de carácter académico e de empresas relacionadas coa lingua, de diferentes países, pasarán pola tribuna.

Finalmente intervirán os grupos do Parlamento, que valorarán a sesión. Despois terán unhas semanas para elaborar un relatorio sobre o Acordo Ortográfico antes de que sexa sometido a aprobación, seguramente no próximo mes de maio.