A superbanda de veteranos

CULTURA

Magín Blanco e Burgas Beat alíanse para gravar un disco ?de melodías pop con enerxía eléctrica de «rock and roll»

20 ene 2008 . Actualizado a las 02:00 h.

Magín Blanco e Burgas Beat acaban de gravar once cancións destinadas a un disco que sairá en primavera cheo de «melodías pop con electricidade roqueira».

Nubes y sirenas será o título deste álbum gravado esta mesma semana en Casa de Tolos e que será publicado por Pai Música. Esta fusión de veteranos da música galega naceu pouco despois de que o valdeorrés Magín Blanco concluíse o seu segundo disco en solitario, Realidade (Pai Música), e buscase unha banda para non ter que enfrontarse a soas coa guitarra contra o mundo. Burgas Beat estaba no outro lado da provincia de Ourense e no grupo non desgustou a posibilidade de meter un pouco máis de acústica nas súas cancións.

Cinco días de gravacións e once cancións que se reparten en cinco da colleita Burgas, cinco de Magín Blanco e unha versión «en serio» e en galego do Anduriña de Juan y Junior. Para Carlos Rego, guitarra e voz de Burgas Beat, «o raro de gravar con Magín é que non pasase antes, el quería un grupo para tocar en directo e pasar de aí ao disco foi case unha consecuencia de buscar un repertorio que valese para os dous».

Blanco apunta que o resultado é «moi equilibrado». Explica que a chave do disco son «as melodías pop tratadas con potencia eléctrica». Magín asegura que no disco vai haber un equilibrio entre o «sonido sucio e limpo». Carlos Rego traduce esa harmonía na intención de que se note no traballo que a suma destas dúas identidades é «un grupo de directo». Rego comenta que nas sesións de gravación fixeron «todo o posible por facelo como en directo». O guitarrista sinala que é un «xeito que se está recuperando nas bandas de rock».

No que coinciden Rego e Blanco é na complementariedade das partes. Rego admite que o valdeorrés «dá un punto acústico» que non tiñan. Magín Blanco considera que Burgas Beat ten «un corpo eléctrico» que el non podía dar.