PROMOCIÓN Unha revolución de hai 5.000 anos, en «A Gran Historia de Galicia»

Galicia, como a maioría do litoral atlántico, viviu entre o IV e o III milenio unha auténtica revolución marcada pola aparición da metalurxia. Esta etapa de crecemento desencadeou aquí -non así en todos os demais sitios- importantes cambios tanto sociais como culturais nas comunidades campesiñas. Iso é o que pon de manifesto a segunda entrega que A Gran Historia de Galicia dedica á nosa Prehistoria e que, escrita polo profesor José Manuel Caamaño Gesto, se centra no Calcolítico e a Idade do Bronce.

Os lectores que adquiran mañá o seu exemplar de La Voz poderán mercar con el este novo libro ao prezo de 3,95 euros.

Profusamente ilustrado a cor do mesmo xeito que toda a colección, o volume ofrécenos a posibilidade de contemplar as mostras máis representativas das armas, a cerámica, menhires, gravados rupestres, petroglifos e demais manifestacións desta etapa histórica, así como de coñecer as achegas máis recentes dos investigadores sobre a sociedade de tempos tan remotos.

Estamos a falar, por exemplo, dunha etapa na que a aparición do arado de tracción animal representa un cambio fundamental na agricultura coa mellora no sistema de cultivos, a valorización dos terreos de maior produtividade no fondo dos vales e a ampliación dos espazos agropecuarios.

Esa maior riqueza na época que camiña cara ao Bronce permitiría ademais uns intercambios comerciais aos que se incorporarían pouco a pouco os chamados bens de prestixio e, entre eles, obxectos elaborados en metais preciosos. Como unha das primeiras evidencias cítase a diadema de ouro atopada nunha mámoa da Veiga dos Mouros (As Pontes) que apareceu cabo de varias puntas tipo palmela de cobre e unha de bronce. E así chegamos ao Bronce final, que comeza co derrubamento dos grandes poderes do Mediterráneo polos chamados «Pobos do mar» e a extensión dos «Campos de urnas» centroeuropeos, con importantes melloras na produción metalúrxica. Estas póñense de manifesto na nosa terra, por exemplo, co depósito de Samieira, composto por 170 machadas de talón cun peso superior aos 150 kilos que case duplica o calculado para toda a metalurxia do calcolítico e do Bronce medio.

Unha mostra dos cambios que se producen é tamén a introdución progresiva do chumbo nas aliaxes e o desenvolvemento dos lazos e relacións entre os distintos focos atlánticos.